Aron Nelson, një 43-vjeçar në Wisconsin akuzohet për vrasjen e gruas së tij dhe asgjësimin e trupit të saj. Pas ngjarjes së rëndë ai u paraqit si “i ve” dhe përdori unazën e saj të martesës për t’i propozuar një gruaje tjetër që e njohu në Tinder.
Ai u arrestua të premten me akuzat për vrasje të shkallës së parë dhe fshehje të një trupi. Sipas policisë, trupi i vrarë i viktimës, Alexis Nelson, nuk është gjetur që kur ajo u zhduk rreth një vit më parë.
Autoritetet thonë se çifti është parë për herë të fundit në pamjet e kamerave të sigurisë më 29 mars 2025, në një dyqan ushqimor në qytetin Beaver Dam, ku jetonin. Pak pasi gruaja u zhduk, të dhënat e saj telefonike treguan se ajo ka qenë zhvendosur në një zonë tjetër.
Sipas dokumenteve të gjykatës, 43-vjeçari krijoi më pas një profil të rremë në Facebook me emrin “James Nelson”, duke pretenduar se ishte i ve. Menjëherë pas kësaj, ai takoi një grua përmes platformës së takimeve Tinder, me të cilën, siç dëshmoi ajo para autoriteteve, ai u zhvendos të jetonte me të brenda pak javësh.
Gjatë hetimit, oficerët vunë re se partnerja e re e 43-vjeçarit mbante një unazë fejese, e cila më vonë u konfirmua se i përkiste gruas së tij të zhdukur. Një hetim i mëvonshëm gjeti një kosh plehrash në rezidencën e partneres së tij të re që përmbante gjurmë gjaku që u identifikuan si Alexis Nelson, ndërsa një qen i trajnuar posaçërisht për të nuhatur kufoma gjeti shenja të dekompozimit njerëzor në një ndërtesë anësore në pronë.
Edhe pse trupi i gruas nuk është gjetur deri më sot, autoritetet kanë arrestuar të pandehurin, i cili përballet me akuza të rënda për vrasje dhe fshehje të provave.
Comments are closed.