Një ngjarje e rëndë është raportuar në Maliq, në zonën e Lozhanit.
Dyshohet se gjatë një operacioni policor, një person ka qëlluar për vdekje një efektiv policie i trupave “Shqiponja” dhe ka plagosur një tjetër.
Po ashtu, raportohet se edhe autori i dyshuar ka mbetur i plagosur gjatë përplasjes me armë.
Burime bëjnë me dije se autori i kësaj ngjarje të rëndë është kapur i plagosur dhe mësohet se ai është një ish-ushtarak, i cili ishte shpallur në kërkim nga policia e Vlorës.
Ndërsa ngjarja është në zhvillim e sipër, jane identifikuar edhe emrat e personave të përfshirë në këtë ngjarje tejet të rëndë.
Konkretisht, personi në kerkim dhe autori i dyshuar për vrasjen e efektivit të policisë është shtetasi Violand Bracellari.
Ndërsa, punonjësi i Policisë që ka humbur jetën quhet Enea Mekolli dhe punonjësi tjetër i policisë që ka mbetur i plagosur quhet Edison Adri, i cili është transportuar drejt spitalit të Traumës në Tiranë.
Njoftimi nga Policia Korçë
Informacion paraprak
Humbet jetën në krye të detyrës, 1 punonjës policie, si dhe plagoset një tjetër punonjës policie, nga sulmi me armë zjarri nga një person i kërkuar i cili u neutralizua dhe u plagos gjatë shkëmbimit të zjarrit
gjatë një operacioni për kapjen e tij.
Në zbatim të planit të masave për kapjen e personave në kërkim, bazuar dhe në informacionet e siguruara për vendndodhjen e një personi të kërkuar, me rrezikshmëri të lartë, shërbimet e Drejtorisë Vendore të Policisë Korçë, Komisariatit të Policisë Maliq dhe të Komisariatit të Policisë Korçë, kanë organizuar punën dhe kanë shkuar në zonën e Lozhanit, në malin Boden, Bashkia Maliq.
Rreth orës 07:30, shërbimet e Policisë kanë rrethuar vendin (stanin) ku dyshohej se fshihej personi në kërkim, konkretisht shtetasi Violand Braçellari, 43 vjeç, i dënuar në vitin 2017 me 9 vjet, 11 muaj e 7 ditë burgim nga Gjykata e Korçës, për veprën penale “Prodhimi dhe shitja e narkotikëve”, ndërsa në vitin 2011 ndaj tij është caktuar masa e sigurisë “Arrest në burg”, për veprën penale “Kultivimi i bimëve narkotike”.
Shërbimet e Policisë i kanë bërë thirrje të kërkuarit të dilte dhe të dorëzohej, por ai nuk i është bindur thirrjes së Policisë dhe ka hapur zjarr në drejtim të punonjësve të Policisë, ku për pasojë ka humbur jetën punonjësi i Policisë, inspektor E. M., 34 vjeç, dhe ka mbetur i plagosur punonjësi i Policisë, inspektor E. A., 36 vjeç (të dy punonjës të Forcës së Posaçme “Shqiponja” të DVP Korçë).
Për të neutralizuar sulmin e të kërkuarit, shërbimet e Policisë i janë kundërpërgjigjur me armë zjarri dhe, si pasojë e shkëmbimit të zjarrit, ka mbetur i plagosur edhe i kërkuari, shtetasi Violand Braçellari, i cili më pas është arrestuar.
Në drejtim të vendit të ngjarjes është nisur helikopteri i shëndetësisë.
Grupi hetimor, nën drejtimin e Prokurorisë dhe në bashkëpunim me Agjencinë e Mbikëqyrjes Policore, po vijon punën për dokumentimin e plotë ligjor të kësaj ngjarjeje shumë të rëndë, ku humbi jetën në krye të detyrës një punonjës Policie dhe mbeti i plagosur një tjetër punonjës i Policisë.
Shpallet “Dëshmor i Atdheut”, Enea Mekolli
Pas ngjarjes së rëndë në Maliq ku humbi jetën efektivi i forcave Shqiponja, Enea Mekolli dhe u plagos efektivi tjetër Edison Adri, gjatë një shkëmbimin zjarri me armë me personin e shpallur në kërkim, Violand Braçellari, ka reaguar edhe kryeministri Rama.
Rama ka shpallur ‘Dëshmor i Atdheut’ efektivin e vrarë, dhe shtoi se autori duhet të ndëshkohet maksimalisht.
“Gjatë një operacioni kurajoz për kapjen e një të shumëkërkuari, që prej vitesh i fshihej ligjit në malet e Korçës dhe në mënyrë të përsëritur kishte arritur t’u ikte rrethimeve të forcave të rendit, ka humbur jetën një efektiv policie e është plagosur një i dytë, ndërkohë që pasi ka hapur zjarr ndaj tyre u plagos dhe u kap edhe krimineli!
Nderim përjetë dëshmorit të atdheut, ngushëllime familjes dhe shërim të shpejtë efektivit tjetër.
Ndëshkim maksimal për të shumëkërkuarin dhe respekt maksimal për Policinë e Shtetit, që nuk do të ndalet asnjëherë në misionin e saj”, shkruan Rama.
Comments are closed.