Moti pritet të ndryshojë gjatë ditëve në vijim, me reshje shiu dhe një rënie të ndjeshme të temperaturave, veçanërisht në orët e para të mëngjesit.
Sipas meteorologes Tanja Porja, sot vendi do të karakterizohet nga kushte të qëndrueshme atmosferike, me mot kryesisht të kthjellët dhe me diell.
Temperaturat maksimale pritet të arrijnë deri në 26°C, ndërsa në zonat malore të veriut dhe verilindjes, temperaturat minimale mund të zbresin deri në 4°C.
Porja tha se ndryshimi i situatës atmosferike pritet të nisë të premten, kur një masë ajrore më e ngrohtë dhe e lagësht që vjen nga jugu do të sjellë reshje shiu dhe rrebeshe afatshkurtra në pjesën më të madhe të territorit.
Pavarësisht reshjeve, mëngjeset do të vijojnë të jenë të ftohta, ndërsa gjatë fundjavës temperaturat maksimale pritet të shënojnë një rritje graduale.
Meteorologia paralajmëroi gjithashtu se luhatjet e ndjeshme të temperaturave, veçanërisht gjatë orëve të para të ditës, mund të krijojnë kushte të favorshme për përhapjen e virozave sezonale.
“Reshjet do të jenë kalimtare dhe do të vijojnë pjesërisht edhe gjatë paradites së të shtunës, kryesisht në zonat lindore dhe juglindore. Do kemi rënie drastike të temperaturave. Nga pjesa e dytë e së shtunës, si dhe gjatë së dielës e të hënës, moti do të përmirësohet sërish me kthjellime dhe vranësira të pakta kalimtare.
Që nga dita e djeshme, por edhe në vijim deri të hënën, kryefjala e kushteve të motit përveç vranësirave dhe rrebesheve që presim ne shumë pranë fundjavës janë rënie drastike të vlerave termike kryesisht dhe më të theksuar në orët e para të ditës. Prandaj dhe mund të jetë një periudhë e cila favorizon virozat.
Të dielën termometri do të arrijë deri në 27°C, ndërsa të hënën deri në 28°C”, tha Porja.
Comments are closed.