Ministri i Brendshëm, Besfort Lamallari mbajti këtë të mërkurë një deklaratë për mediat, ku u ndal në një sërë çështjesh që lidhen me sigurinë, rendin publik dhe masat e marra për sezonin turistik veror.
Gjatë konferencës, ai prezantoi prioritetet dhe masat konkrete të institucioneve ligjzbatuese për garantimin e sigurisë në të gjithë territorin e vendit, si dhe forcimin e kontrollit dhe rritjen e efikasitetit të strukturave shtetërore.
Lamallari theksoi se përballë rritjes së vazhdueshme të numrit të turistëve, Policia e Shtetit dhe institucionet përgjegjëse kanë marrë masa të shtuara për të garantuar sigurinë gjatë sezonit veror. Ai bëri me dije se do të ketë prezencë më të madhe policore në zonat bregdetare dhe malore, ndërsa do të organizohen patrullime të posaçme 12-orëshe për ruajtjen e rendit dhe sigurisë publike.
“Kemi parë nga vitit në vit, kemi parë fluks të pushuesve. Si policia e Shtetit ashtu edhe struktura të shtetit kanë marrë masat përkatëse, si garantimin e sigurisë, por edhe mikpritjen dhe siguria totale në territor. Kjo është shtuar me shtim të pranisë policore, në zonat bregdetare dhe zonat malore.
Do kemi patrullim të veçanta dhe patrullime 12 orëshe. Shqipëria gjithnjë dhe më shumë po spikat për aftësitë policore. Nga ana tjetër, një element tjetër është funksionaliteti i plotë i policisë detare dhe kufitare. Ku do të dëshmojnë kapacitetet e tyre me në fokus të veçantë plazhet e Shqipërisë.”, tha Lamallari, teksa më tej u ndal dhe te lufta kundër kultivimit të kanabisit.
Lamallari bëri të ditur forcimin e bashkëpunimit me Guardia di Finanza, duke shtuar monitorimin ajror për identifikimin e rasteve të kultivimit të lëndëve narkotike. Sipas tij, përdorimi i një avioni që transmeton koordinata në kohë reale do të ndihmojë në rritjen e efikasitetit të operacioneve në terren.
Gjithashtu, ministri foli edhe për masat kundër zjarreve gjatë sezonit të verës, duke theksuar se Ministria e Brendshme ka hartuar një plan të posaçëm për parandalimin e zjarrvënieve dhe mbrojtjen e jetës, pronës dhe mjedisit.
“Gjatë sezonit të verës kemi rastë të zjarrvënieve, edhe të qëllimshme. Ministria e Brendshme ka hartuar një plan masash. Në fokus mbetet parandalimi i rasteve të zjarrit, mbrojtja e jetës, pronës dhe mjedisit. Kemi angazhim shumë të shtuar me bashkitë, me autoritetet vendore. Kemi kontrollet që do vijojnë në vijim, në hotele, bare, restorante, ku ka flukse të shtuar të qytetarëve, për të parë masat. Operacione të tilla garantojnë turizëm cilësor”, tha Lamallari.
Comments are closed.