Moti në Shqipëri do të vijojë të jetë kryesisht i kthjellët gjatë ditëve të ardhshme, por temperaturat e ulëta do të ndihen veçanërisht në orët e mëngjesit. Nga fundjava pritet ndryshim i kushteve atmosferike, me shtim të vranësirave dhe rikthim të reshjeve të shiut dhe dëborës.
Meteorologia Tanja Porja, bëri të ditur se gjatë së enjtes temperaturat maksimale do të arrijnë deri në 22 gradë Celsius në zonat jugperëndimore, ndërsa në zonat malore do të luhaten nga 13 deri në 16 gradë.
Të premten pritet një tjetër rënie e lehtë e temperaturave, megjithëse moti do të mbetet kryesisht i kthjellët.
Sipas meteorologes, mëngjesi i së shtunës do të jetë i ftohtë, me temperatura që në zonat e thella malore do të zbresin deri në minus 1 gradë Celsius.
“Mëngjesi i së shtunës do të sjellë temperatura deri në minus 1 gradë celsius në zonat e thella malore, ndërsa nga mesdita e kësaj dite dhe gjatë së dielës pritet një rritje graduale e vlerave termike. Ndryshimi i kushteve atmosferike do të nisë nga fundjava. Të shtunën pasdite dhe gjatë natës do të shtohen vranësirat, të cilat do të mbizotërojnë deri të martën. Të dielën parashikohen reshje të pakta shiu, kryesisht në hapësirat detare dhe përgjatë vijës bregdetare. Të hënën reshjet do të përfshijnë kryesisht veriun dhe zonat perëndimore, ndërsa të martën pritet të shtrihen në pothuajse të gjithë territorin, me intensitet disi më të lartë”, tha meteorologia Tanja Porja.
Ndërkohë, në zonat malore mbi 1500 metra lartësi, nga e diela deri të martën parashikohen edhe reshje të dobëta dëbore.
Sipas Porjës, dëbora pritet të krijojë një shtresë prej rreth 2-3 centimetrash, kryesisht në zonat e pabanuara malore.
Moti merr kthesë në fundjavë, nga e diela rikthehen shiu dhe dëbora në Shqipëri
