Ditën e djeshme Shkodra i dha lamtumirën e fundit biznesmenit Flamur Hoxha, një njeriu të veçantë dhe të rrallë, për të cilin prej vitesh flitej me respekt në veri të vendit. Në moshën 73-vjeçare, Hoxha u përcoll për në banesën e fundit mes dhimbjes së familjarëve, miqve, bashkëpunëtorëve dhe shumë qytetarëve që e njohën dhe e vlerësuan ndër vite.
Përmes shumë reagimeve, të miqve, por jo vetëm, ka dalë në pah portreti i një njeriu që kishte ditur të ndërtonte jo vetëm një sipërmarrje, por mbi të gjitha marrëdhënien me njerëzit, respektin dhe një emër të mirë në qytetin ku jetoi dhe punoi.
Flamur Hoxha kujtohet si një sipërmarrës i suksesshëm, një qytetar aktiv dhe i denjë i Shkodrës. Në mesin e shumë reagimeve ka qenë dhe ai i ish-deputetes Edona Bilali, e cila përmes rreshtave e ka përshkruar Hoxhën si një njeri që la pas një trashëgimi të pasur dhe një shembull të veçantë. Sipas saj, ai dëshmoi se mund të jesh një sipërmarrës i suksesshëm pa humbur thjeshtësinë, përkushtimin ndaj familjes dhe lidhjen me qytetin.
“Të Zotit jemi dhe tek ai kthehemi” – Flamur Hoxha u nda nga jeta duke lanë trashëgimi shumë të pasur mbrapa. Na mësoi që mund të jesh sipërmarrës pa hije mbrapa, të jetosh për veten por edhe për familjen e tij të madhe të mrekullueshme. Qytetar i denjë dhe aktiv i Shkodrës. Dhe shumë mesazhe sa ishe në jetë, për vazhdimësinë e jetës, për qetësinë, për urtësinë e dashamirësinë dhe po jep po aq edhe me respektin që ke lënë ndër njerëz tani që fizikisht nuk je ma. I lehtë të qoftë dheu . Ngushëllime Lulit, Andit, Enit, Erjonës, Sarukut, Dinës, familjarëve dhe dashamirësve. Shkodra i dha Zotit një nga të mirët e vet”, shkruan ajo.
Por një tjetër dimension i karakterit të Flamur Hoxhës vjen nga ata që ndër vite kanë përfituar drejtpërdrejt nga bujaria e tij.
Shoqata e kafshëve në nevojë e ka përshkruar Hoxhën si një prej njerëzve që i ndihmoi për t’u ofruar strehës kafshëve. Në vitin 2014, në një kohë kur Shkodra përballej me një numër të madh kafshësh endacake, Hoxha ndërtoi strehën që më pas do të shërbente për mijëra qen.
Për plot 12 vite, sipas shoqatës, ajo hapësirë u vu në dispozicion pa pagesë për qira, ujë, energji elektrike apo roje. Edhe kur toka ku ndodhej streha nuk ishte më në dispozicion të shoqatës, Hoxha u mundësoi sërish qëndrimin në tokën e tij, derisa të gjendej një zgjidhje e re.
Flamur Hoxha u përcoll ditën e djeshme në banesën e fundit. Ai u përcoll si bashkëshort, prind, familjar, mik, bashkëpuëntor dhe qytetar. U përcoll me kujtimet e njerëzve që patën fatin ta njihnin dhe me mirënjohjen e atyre që në një moment të jetës së tyre, gjetën tek ai një dorë të shtrirë për ndihmë.
Familja ka njoftuar se ditën e sotme, nesër dhe të dielën, ata do të presin në shtëpi vizitat e ngushëllimit, duke përballuar dhimbjen e humbjes së një prej njerëzve të saj më të dashu
