Legjenda e futbollit anglez, Kevin Keegan, ka ndërruar jetë në moshën 75-vjeçare, vetëm shtatë javë pasi bëri të ditur publikisht se ishte diagnostikuar me kancer në fazën e katërt. Lajmi u konfirmua nga familja e tij, e cila njoftoi se ish-futbollisti dhe trajneri u shua i rrethuar nga bashkëshortja dhe dy vajzat e tij, shkruan A2 CNN.
Keegan konsiderohet një nga figurat më të mëdha në historinë e futbollit anglez. Gjatë karrierës së tij si lojtar, ai veshi fanellat e Scunthorpe United, Liverpool, Hamburg, Southampton dhe Newcastle United, duke fituar një sërë trofesh dhe duke lënë gjurmë në çdo klub ku luajti.
Një nga arritjet më të mëdha individuale të karrierës së tij ishte fitimi i Topit të Artë për dy vite radhazi, çmim që e vendosi mes futbollistëve më të mirë të brezit të tij. Ai ishte gjithashtu kapiten i kombëtares së Anglisë dhe një prej lojtarëve më të respektuar të futbollit evropian.
Pas përfundimit të karrierës si futbollist, Keegan pati sukses edhe në stol, duke drejtuar Newcastle United, Fulham, kombëtaren e Anglisë dhe Manchester City. Ai mbetet veçanërisht i dashur për tifozët e Newcastle, ku jo vetëm luajti, por edhe riktheu klubin mes skuadrave më konkurruese të futbollit anglez gjatë periudhës si trajner.
Newcastle United e cilësoi Keegan si “një nga figurat më ikonike, më me ndikim dhe më të dashura në historinë e klubit”. Klubi theksoi se ai ishte “më shumë sesa një futbollist dhe trajner legjendar, ishte zemra e Newcastle United për breza të tërë tifozësh”. (A2 Televizion)
