Një grua ka rrëfyer në mënyrë anonime dilemën që po përjeton prej dy vitesh, mes martesës dhe lidhjes me një tjetër burrë.
Ajo tregon se bashkëshorti dhe i dashuri janë në dijeni të situatës, pasi martesa e saj funksionon si një marrëdhënie e hapur. Por ajo që nisi si një shkëputje nga rutina, pa premtime dhe pa përfshirje emocionale, është kthyer në një lidhje me ndjenja të forta.
Dy fundjava në muaj, gruaja takon të dashurin dhe kalon kohë me familjen e tij. Këta të fundit, megjithatë, besojnë se ajo është e ndarë dhe ka një vajzë.
“Kur jam me burrin, mendoj për tjetrin. Edhe kur shkojmë me pushime, mendja më shkon tek ai”, rrëfen ajo.
Gruaja shpjegon se bashkëshorti nuk i ka bërë asgjë të pafalshme dhe se kanë ndërtuar së bashku një familje të qëndrueshme. Megjithatë, thotë se brenda përditshmërisë nuk ndihet më e lumtur, ndërsa me të dashurin ndihet më e dëshiruar dhe më e gjallë.
Por pikërisht këtu lind edhe dyshimi i saj më i madh: a është dashuruar me një tjetër burrë apo me jetën pa përgjegjësi të përditshme që përjeton pranë tij?
“Ndoshta nuk po krahasoj dy dashuri, por dy jetë krejt të ndryshme”, shprehet ajo, duke pranuar se takimet e tyre nuk përballen me faturat, punët e shtëpisë dhe lodhjen e rutinës.
Mes frikës për të humbur familjen dhe shqetësimit se mund ta kalojë jetën duke u shtirur e lumtur, ajo ende nuk di çfarë vendimi të marrë.
