Anasayfa » Njoftim i rëndësishëm për pensionistët në Kosovë, ja kush duhet të paraqitet çdo …

Njoftim i rëndësishëm për pensionistët në Kosovë, ja kush duhet të paraqitet çdo …

Ministria për Punë, Familje dhe Vlerat e Luftës Çlirimtare ka dalë me një njoftim të rëndësishëm për pensionistët në Kosovë, duke rikujtuar obligimin për paraqitje periodike në zyrat e pensioneve.

Sipas njoftimit të Ministrisë, përfituesit e pensionit bazik të moshës dhe të pensionit të parakohshëm të Trepçës janë të obliguar të paraqiten në zyrat e pensioneve një herë në gjashtë muaj.

Ky obligim është i përcaktuar me legjislacionin në fuqi dhe synon të sigurojë vazhdimësinë e rregullt të pagesave pensionale.

Pensionistët që përfitojnë nga këto dy skema duhet të paraqiten në zyrën më të afërt të pensioneve, sipas vendbanimit të tyre. Gjithashtu, një nga kushtet për përfitimin e këtyre pensioneve është rezidenca në Republikën e Kosovës.

Ndërkaq, përfituesit e skemave të tjera pensionale dhe sociale nuk kanë obligim të paraqiten periodikisht.

Verifikimi në shtëpi për pensionistët mbi 80 vjeç

Ministria ka bërë të ditur se për pensionistët mbi moshën 80-vjeçare, si dhe për ata që kanë probleme shëndetësore, ofrohet mundësia e verifikimit në shtëpi përmes ekipeve mobile.

Ky shërbim është në dispozicion shtatë ditë në javë dhe mund të kërkohet nga vetë pensionisti ose nga familjarët e tij, përmes telefonit apo postës elektronike.

Për pensionistët e rajonit të Prishtinës, përfshirë edhe ata të Podujevës, informacionet mund të merren në numrin:

038/213/268

Ministria u bën thirrje të gjithë përfituesve që t’i respektojnë këto obligime, në mënyrë që të shmangin ndërprerjen e pagesave të pensioneve.