Qytetarët që kanë ndërtuar pa leje dhe kjo është konstatuar edhe nga pushteti vendor do të sekuestrohen në rast se nuk do të deklarohen. Projektligji solli diskutime në Komisionin Parlamentar për Mjetet e Informimit Publik, ku kryetarja Jorida Tabaku kërkoi shpjegime për administrimin e pronave dhe parave të konfiskuara.
Çdo ndërtim pa leje që është konstatuar nga institucionet vendore apo organe të tjera administrative do konfiskohet në rast se qytetari nuk e vetëdeklaron.
Në komisionin për Mjetet e Informimit Publik, Administratorja e Përgjithshme e Agjencisë për Administrimin e Pasurive të Sekuestruara dhe të Konfiskuara, Risena Xhaja tha se qytetarët mund të kenë mundësi parablerjeje nëse e raportojnë këtë ndërtim brenda 60 ditëve nga miratimi i ligjit të ri.
Opozita e kundërshton përfshirjen e këtyre ndërtimeve në kompetencën e agjencisë.
Diskutimet u përqendruan edhe te ankandi që do u japë mundësi individëve apo subjekteve për të blerë pasuri të cilat nuk janë në përdorim nga agjencia.
Drejtuesja e agjencisë dhe përfaqësuesit e Ministrisë së Brendshme u shprehën se qëllimi është që të shfrytëzohen në maksimum pasuritë në mënyrë që të mos shpërdorohen me kalimin e kohës.
Comments are closed.