Më 10 tetor 2026, Eric Wendt u takua me tre deputetët e opozitës, duke anashkaluar kryetarin e PD-së dhe 5 drejtuesit kryesorë. Dy javë më vonë, Oerd Bylykbashi doli me një platformë që kërkon fundin e sundimit të NJËSH-it, qarkullim demokratik, lista të hapura, referendume, transparencë financimesh dhe ndarje nga krimi; 10 goditje të drejtpërdrejta ndaj Sali Berishës dhe klanit të tij.
Më 10 tetor 2026, Ambasadori Amerikan në Shqipëri, Eric Wendt, zhvilloi takim konfidencial me deputetët e opozitës Oerd Bylykbashi, Jorida Tabaku e Ivi Kaso, duke shpërfillur kryetarin e PD-së, Sali Berisha, dhe 5 drejtuesit kryesorë të kësaj partie.
Dy javë pas takimit, Oerd Bylykbashi doli me një platformë politike për rrugët e zgjidhjes së krizës që ka pllakosur vendin, shkaktuar prej autokracisë dypartiake PS-PD, kapjes së pushtetit dhe sundimit të përbashkët të Edi Ramës e Sali Berishës.
Referuar natyrës prej “balerini” të Oerd Bylykbashit në jetën politike, qysh prej kohës kur ishte drejtor në Kryeministri gjatë pushtetit të PD-së dhe pas vitit 2013 si deputet liste i kësaj partie, bënë përshtypje fakti që në platformën e tij ka “shuplaka” të guximshme e të forta ndaj sundimit dhe mëkateve të Sali Berishës.
“Perandori” i PD-së, Sali Berisha, “shënjestër” e 10 goditjeve nga oficeri i Perandorisë:
· Deputeti Oerd Bylykbashi ka kërkuar t’i jepet fund sundimit të NJËSH-it në partitë politike, kuptueshëm sundimit të Sali Berishës, duke bërë thirrje për demokratizimin e PD-së dhe funksionim me mendim e vendime kolegjiale të anëtarësisë e forumeve drejtuese.
· Ka kërkuar t’i jepet fund mendësisë kolektive se lideri i partisë ka mision e pozicion të përjetshëm në krye të saj me mitizim si i pazëvendësueshëm, duke goditur sundimin e Sali Berishës prej 36 vitesh në krye të PD-së.
· Ka kërkuar qarkullimin demokratik në drejtimin e partisë, me qëllim rinovimin dhe ripërtëritjen e lidershipit; gjë të cilën Sali Berisha dhe klani i tij nuk e lejojnë, madje deklaroi se nuk do të largohet nga posti i kryetarit të PD-së.
· Goditja tjetër që Bylykbashi i dha Sali Berishës është kërkesa emergjente për të shfuqizuar Kodin Zgjedhor dhe hartimin e një kodi të ri, jo me arnime siç janë bërë në vitet 2014, 2017, 2020 e 2024 nga PS dhe PD.
· Ka kërkuar të rikthehen plotësisht listat e hapura për zgjedhjen e deputetëve në zona; për kompetencat e presidentit dhe ndarjen e pushteteve, duke shfuqizuar ndryshimet kushtetuese që Sali Berisha e Edi Rama bënë në muajin prill 2008.
· Ka kërkuar që listat e kandidatëve për deputetë dhe për kryebashkiakët të mos i bëjë kryetari i partisë, por të kenë pëlqimin e anëtarësisë, të komunitetit në zonat ku do garojnë dhe të jenë figura të pastra e pa çështje penale.
· Ka kërkuar të rikthehen referendumet, si formë e vullnetit të sovranit, duke i dhënë të drejtën për miratim çështjesh jetike të tyre dhe shfuqizim të ligjeve që cenojnë interesat publike.
· Ka kërkuar që partia të bëjë transparencë të plotë për financimet që merr, burimet e tyre, shpenzimet dhe lobimet, për t’i dhënë fund korrupsionit e financimit të paligjshëm oligarkik apo kriminal të partisë e kryetarit të saj.
· Partia duhet të ndahet nga krimi, dhe për çdo rast të konstatuar, i zgjedhuri në çdo funksion, zyrtari e anëtari i partisë që implikohet, nuk duhet të jetë më pjesë e grupimit partiak.
· Kryetari i partisë dhe drejtuesit e tjerë të forumeve e strukturave në bazë të mos zgjidhen me tepër se dy mandate radhazi, duke llogaritur mandatet e mëparshme.
Platforma që ka paraqitur deputeti Oerd Bylykbashi është për të gjitha partitë dhe kryetarët e tyre, por ballafaquar me realitetin në kupolën e PD-së, propozimet janë “shuplaka” të hapura e të forta ndaj sundimit dhe mëkateve të kryetarit Sali Berisha./Pamfleti
Pas takimit me Ambasadorin e SHBA, deputeti Oerd Bylykbashi i jep 10 “shuplaka” të forta Sali Berishës
