Dy persona kanë humbur jetën dhe 33 të tjerë janë lënduar në një aksident të rëndë trafiku në Kroaci, pasi një autobus me targa të Serbisë u përmbys në autostradën A3, në drejtim të Zagrebit, mëngjesin e së dielës.
Sipas të dhënave të publikuara nga Ministria kroate e Shëndetësisë, gjashtë persona kanë pësuar lëndime të rënda, ndërsa 27 të tjerë janë lënduar lehtë. Në autobus ndodheshin gjithsej 35 persona, përfshirë 33 pasagjerë dhe dy shoferë.
Aksidenti ndodhi rreth orës 07:25, në kilometrin e 61-të të autostradës A3, menjëherë pas nyjës rrugore Ivanić-Grad. Autobusi doli nga rruga, depërtoi përmes barrierës mbrojtëse dhe u përmbys në një sipërfaqe me bar pranë autostradës.
Në vendin e ngjarjes u dërguan nëntë ekipe të emergjencës mjekësore, përfshirë edhe një helikopter për transportimin e të lënduarve. Në operacion morën pjesë gjithashtu 15 zjarrfikës me shtatë automjete.
Të lënduarit u transportuan në pesë spitale të Zagrebit. Në mesin e tyre është edhe një 20-vjeçare në gjendje të rëndë, e cila u dërgua në spital me helikopter.
Sipas mediave kroate, autobusi i përket kompanisë serbe të transportit “Niš ekspres”.
Për shkak të aksidentit, qarkullimi në këtë segment të autostradës u zhvillua me vështirësi, vetëm në njërën korsi.
Policia kroate po kryen hetimet për të përcaktuar shkakun e aksidentit, ndërsa identitetet dhe shtetësitë e viktimave nuk janë bërë ende publike.
