Një përleshje me armë zjarri është regjistruar në orët e para të mëngjesit të kësaj të shtune në zonën e Mikrolimanos, në Athinë, ku protagonist ka qenë një shtetas shqiptar i njohur për autoritetet greke si pjesë e botës së krimit.
Burimet paraprake bëjnë me dije se efektivët e sektorit antikrim kishin organizuar një operacion për kontrollin e një personi të dyshuar si pjesë e një grupi gjobvënësish që vepronte në Athinë. Gjatë ndërhyrjes së policisë, situata ka dalë jashtë kontrollit, pasi i dyshuari dyshohet se ka nxjerrë armën dhe ka tentuar të qëllojë në drejtim të oficerëve civilë.
Policia greke është kundërpërgjigjur menjëherë me armë, duke plagosur shqiptarin, i cili sipas “Top Channel” është identifikuar si Alesio Xhelo, i njohur gjithashtu edhe me disa identitete të tjera. Në dosjet e autoriteteve greke ai rezulton me emrat Astrit Hasani, Titi Jorgo, Niko Niku, Hasan Hastani dhe Xhelo Hasani.
I plagosuri, i njohur në qarqet kriminale me nofkën “Titi”, u transportua me urgjencë në spitalin “Attikon”, ku ndodhet nën mbikëqyrje të rreptë policore. Sipas burimeve mjekësore, gjendja e tij shëndetësore është e rëndë dhe është duke luftuar për jetën.
Ngjarja ndodhi jashtë një dyqani ushqimor në Mikrolimano, ku një grup prej tetë oficerësh të Prokurorisë së Zhvatjes po zhvillonin kontrollin. Sipas informacioneve të publikuara nga mediat greke, sapo policët iu afruan për verifikim, shqiptari reagoi duke nxjerrë armën. Një prej efektivëve ka përdorur menjëherë armën e shërbimit.
Pas neutralizimit të tij, zona u rrethua nga forca të shumta policie, ndërsa në vendngjarje mbërriti edhe njësia speciale për asgjësimin e lëndëve shpërthyese, pasi pranë të plagosurit u gjet një çantë me gjashtë granata difensive.
Autoritetet greke bëjnë me dije se gjatë kontrollit iu sekuestruan gjithashtu dy pistoleta, një revolver dhe municion luftarak. Hetimet po drejtohen nga sektori antikrim i Drejtorisë së Policisë së Atikës, ndërsa po verifikohet aktiviteti kriminal i shqiptarit, i cili prej vitesh konsiderohej një nga personat më problematikë për autoritetet greke.
Kush është Alesio Xhelo, ose “Titi”:
Alesio Xhelo alias Astrit Hasani nuk është një emër i panjohur për mediat dhe drejtësinë. Në qershor të vitit 2019 ai u arratis nga burgu në Greqi, së bashku me tre shqiptarë të tjerë.
Asokohe katër shqiptarët u arratisën nga qelia e izolimit, pasi neutralizuan policët e shërbimit. Katër shqiptarët u arratisën në mënyrë spektakolare nga qelia e burgut në Athinë rreth orës 04:00 të 3 qershorit të vitit 2019. Ata ishin transferuar në një qendër paraburgimi pas disa përplasjeve mes bandave në burgun famëkeq të Koridhlos.
Siç dhe u raportua vite më parë njëri prej tyre kishte inskenuar duke u shtrirë në qeli sikur ishte i sëmurë, ndërsa gardiani hapi derën e qelisë për të parë se çfarë kishte ndodhur, në këtë moment re të burgosurit e tjerë shqiptarë i vendosën thikën ën fut dhe e çarmatosën, teksa më pas e mbyllën në qeli.
Të katër të burgosurit morën armën duke kërcënuar gardianët e tjerë në katin e parë që i kapën në befasi, ndërsa më pas u arratisën.
Ndërkohë që rezulton se “Titi” ka qenë i dënuar me burgim të përjetshëm për vrasjen e një greku dhe i përfshirë në shkëmbime zjarri me policinë në Greqi, si dhe në dhunimin e gruas se një diplomati të huaj gjatë grabitjes së shtëpisë së tyre.
Emri i tij është lakuar edhe për rrëmbimin e një të riu të cilin e liroi pasi mori një shumë të majme nga familja e tij. Ndërkohë që në mars të vitit të kaluar ai u prangos edhe nga policia shqiptare pasi kërcënoi efektivin e FNSH-së i cili ishte duke e ruajtur në derën e shtëpisë, pasi ai po vuante masën e sigurisë “arrest shtëpie”.
Plumbat “fluturojnë” në mes të Athinës! Përleshje e fortë me armë zjarri, plagoset fieraku i bandave, “makthi” i policisë greke në luftë për jetën (PAMJE)
