Pas sinjaleve ideologjike dhe aktivizimit të qarqeve pranë Ankarasë, po përgatitet një formacion i ri politik që synon të përdorë fenë si instrument për ndikim shoqëror dhe gjeopolitik…
Recep Tayyip Erdogan duket se ka urdhëruar zbritjen në fushë të islamit politik në Shqipëri dhe, sipas të gjitha gjasave, partia apo organizata e re politike mund të regjistrohet së shpejti.
Në fakt, foleja e kësaj lëvizjeje ishte ngritur dhe mbajtur në territor prej kohësh. Tani thjesht është bërë publik fakti se një “Hezbollah” apo “Vëllazëri Myslimane” shqiptare synon të shfaqet si aktor i ri politik në vend.
Dhe për këtë, siç ndodh zakonisht në lëvizje të tilla, është gjetur edhe një ideolog vendas për ta paraqitur si frymëzim për masat. Një figurë që prej kohësh është përgatitur dhe mbështetur, natyrisht jo e vetmja, për t’u përdorur në momentin e përshtatshëm.
Një nga mediat e financuara nga Erdogani, pikërisht ajo që dërgon nëpër studio “profesorë” për të debatuar mbi Lindjen e Mesme, edhe pse shpesh janë krejt jashtë realitetit; ka publikuar atë që duket si “fatvaja” e koduar e sulltanit, por me firmën e Abdi Baletas.
Erdogani lëshon fatva-n e islamit politik në Shqipëri, gati
“Edhe islamofobët në Shqipëri duan t’i detyrojnë myslimanët të zbatojnë ca rite sa për të thënë, të falen e të luten si t’u vijë, por të mos mendojnë se Islami ka nevojë edhe për mbrojtje politike dhe për rol shoqëror, sepse këto qenkan punë të qytetërimit europiano-perëndimor kristiano-judaik”, thuhet në këtë tekst ideologjik, i ndërtuar me kujdes.
Mesazhi është i qartë.
Së pari, theksohet se myslimanët shqiptarë nuk duhet vetëm të praktikojnë fenë, por edhe ta përfaqësojnë atë politikisht.
Së dyti, dhe kjo është pjesa më problematike, tentohet të imponohet një orientim tjetër gjeopolitik për Shqipërinë, jashtë boshtit të saj natyral euro-atlantik.
Këtë, i ndjeri Abdi Baleta e artikulon në mënyrë perfide duke sulmuar atë që e quan qytetërim “kristiano-judaik”.
Një klishe tipike e islamit politik, por jo domosdoshmërisht e botës myslimane orientale në realitetin e sotëm.
Sepse, në fakt, Europa moderne është hapësira që u ka garantuar më shumë të drejta myslimanëve, i ka përfaqësuar politikisht dhe i ka integruar institucionalisht. Madje, siç shihet edhe në çështjen palestineze, Europa është shpesh mbështetësja më e madhe politike dhe humanitare e saj.
Por thelbi i islamit politik sipas modelit të Muslim Brotherhood, që përfaqësohet politikisht nga Erdogani dhe financohet nga Qatari, është tjetër gjë.
Objektivi nuk është vetëm përfaqësimi i islamit, por lufta politike kundër laicizmit dhe orientimit perëndimor të shtetit, për të futur më pas dogmat fetare si propozime politike konkrete.
Kjo është parë në shumë vende: nga debatet për veshjen në shkolla, te organizimi i jetës publike dhe deri te orientimi gjeopolitik i shtetit.
Në Shqipëri, një parti e tillë me shumë gjasa nuk do të ketë sukses elektoral masiv. Sepse edhe qytetarët praktikantë myslimanë nuk kanë treguar prirje për t’u rreshtuar pas formacioneve të islamit politik.
Por objektivi kryesor nuk duket të jetë pushteti direkt.
Synimi është të zbresë në fushë si faktor politik diversiv, për t’u përdorur në funksion të interesave rajonale të Turqisë së Erdoganit, e cila po bëhet gjithnjë e më orientale dhe gjithnjë e më pak demokratike.
Një formacion i tillë nuk do ta ketë problem financimin, sepse burimet vijnë nga aty ku zakonisht financohen këto projekte politike: Katari.
Formacione si Muslim Brotherhood në Egjipt, Hezbollahu në Liban apo Hamasi në Gaza, sipas kritikëve të tyre, vetëm mbulesën e kanë fetare. Në thelb funksionojnë si organizata politike me objektiva të forta ideologjike dhe shpesh konfrontuese.
Asnjëra prej tyre nuk e sheh demokracinë liberale si model përfundimtar.
Dhe nëse një projekt i tillë zbret në Shqipëri, ka shumë gjasa që të mbështillet fillimisht me një emër dhe program laik, ashtu siç bëri vetë Erdogani në fillimet e tij politike në Turqi.
Atëherë ai përdori simbolin e llambës elektrike.
Më pas, simbolika ndryshoi dhe u rikthye gjithnjë e më shumë tek gjysmëhëna otomane./Pamfleti
Comments are closed.