Përmes një postimi në rrjetet sociale, Shamku bën me dije se në Komisariatin nr. 3 janë shoqëruar antropologia gjuhësore amerikane Carrie Ann Morgan dhe artistja Elsa Paja.
Ajo e cilëson ndërhyrjen e policisë të pajustifikuar dhe njofton se do të paraqitet në komisariat për t’i mbështetur.
Në reagimin e saj, ish-deputetja shkruan se slogani që, sipas saj, përmbledh më mirë protestën e sotme është: “Po ti, nga cila anë e gardhit je?”
Në postimin e plotë, Shamku shkruan:
“Carrie Ann Morgan, antropologe gjuhësore, kolegia ime, studiuese dhe shpirt i lirë, u shoqërua sot gjatë protestës.
Elsa Paja, artiste, ilustratore, mikja ime, një shpirt po aq i bukur sa vetë Vjosa-Narta që ajo mbron, u shoqërua sot.
Mendoj se nga sot, slogani më i gjetur i kësaj proteste është: ‘Po ti, nga cila anë e gardhit je?’
Shihemi për pak në Komisariatin nr. 3, ku mbahen të shoqëruara Carrie dhe Elsa!”
Reagimi i Shamkut vjen pas tensioneve të regjistruara gjatë protestës para Kuvendit, e cila u shoqërua me përplasje mes protestuesve dhe policisë, përdorim të gazit lotsjellës dhe sprajit me piper, si edhe shoqërimin e disa pjesëmarrësve në protestë.
Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
