Ministri i Brendshëm, Besfort Lamallari ka komentuar protestën kombëtare që po mbahet në vendin tonë prej 65 ditësh. I ftuar në Klan News, Lamallari tha se nuk është vetëm aktivistja Ikbale Huduti e shpallur “Non Grata”, por janë edhe disa persona që janë shpallur si të padëshiruar nga vendi ynë.
Ministri nuk preferoi që të japë emrat e tyre, po tha se i ka shpallur “Non Grata”, sipas atributeve që atij ia jep ligji shqiptar.
“Fakt është dhe kjo është e dëshmuar , një rast që ju përmendët më herët, ku unë në zbatim të së drejtës që me jep ligjin për të shpallur person të padëshiruar në vendin tonë për 15 vite, ishte dhe rasti i zonjës Ikballe Huduti, e cila në fakt sipas informacioneve të administruara nga agjencitë e shërbimit informativ dhe të zbatimit të ligjit provohej se kishte lidhje dhe veprimtari, të cilët përbejnë shqetësim dhe kërcënim për Shqipërinë. Nuk është vetëm ky rast, edhe pse nuk është bërë publike, edhe më pas në javët në vijim ka pasur raste të tjera, të cilët i kam shpallur persona të padëshiruar në zbatim të atributeve që më jep ligji“, deklaroi ministri.
Ndërsa i pyetur nëse kemi të bëjmë me personazhe publike që janë shpallur si të padëshiruar, Lamallari nuk dha detaje, por shtoi se agjencitë e vendit tonë i kanë parë si kërcënim real për qytetarët.
“Jo detyrimisht, por persona, që sigurisht me shfaqje dhe tendenca shqetësuese ekstremiste, të cilët në tërësinë e tyre, pavarësisht rrymave të ndryshme, të mbështetjes, financimit dhe propagandimit, vlerësohen nga agjencitë e Shqipërisë se përbëjnë kërcënim real për vendin dhe qytetarët shqiptarë dhe rrjedhimisht detyrohem të ndërmarr një vendimmarrje të tillë”, tha ai.
Comments are closed.