Me mijëra qytetar vijojnë të punojnë pavarësisht se kanë dalë në pension, dhe megjithatë paguajnë kontributet si të gjithë të punësuarit e tjerë. Deputeti i PD-së Igli Cara ka propozuar dje ndryshime në ligjin e sigurimeve shoqërore me synim përjashtimin e kësaj kategorie nga detyrimi për të paguar sigurimet, përsa kohë kanë kontribuar një herë për pensionin e tyre. “A është apo jo e drejtë, që një pensionist pasi ka kontribuar 39 vite, të vazhdojë e të kontribuojë në skemë, po ai mund të ndërrojë jetë pas 10 vitesh, po a është kjo e drejtë?
Por kjo s’ka sens logjik, po flasim për një fashë që vazhdon të punojë se ka nevojë për shkak të pensionit të ulët. Për 18 milionë euro flasim, e di që është shumë por duhet të kuptojmë se për cilën kategori po flasim”, shprehet Igli Cara deputet i PD-së. Projektligji synon që përjashtimi të jetë i përkohshëm me afat 4-vjeçar, dhe tashmë po shqyrtohet në komisionet parlamentare, por nuk gjen mbështetjen e qeverisë. “Kjo do të ulte të ardhurat e skemës. Fillimisht cenohet parimi kontributiv i skemës, duke thelluar më tej deficitin dhe krijon trajtim të diferencuar”, thotë Olta Manjani zëvendësministre e Ekonomisë.
Skema
Zëvendësministrja e Ekonomisë Olta Manjani shpjegon se qeveria po diskuton në kuadër edhe të skemës së re të pensioneve, kthimin e këtyre kontributeve si bonus ose duke rritur pensionin mujor të pensionistit që punon. “Alternativat që po shqyrtojmë në kuadër të skemës së pensioneve e cila ende nuk është finalizuar, po shikohet një qasje që kontributet e paguara nga pensionistët pas arritjes së moshës së pensionit, të njihen dhe reflektohen siç është bërë me të vetëpunësuarit. Pra ose ju bëjmë një rillogaritje të pensionit që ajo që kanë kontribuar në skemë do ju reflektohet në masë pensioni, ose dhënien e një bonusi për çdo vit sigurimi, shtesë. Kjo alternativ përveçse ruan parimin kontributiv të skemës krijon edhe stimujt e nevojshëm për vijimin e punësimit të pensionistëve”, thotë Manjani. Referuar relacionit të kësaj nisme ligjore janë rreth 13 mijë pensionistë që punojnë dhe që vijojnë të paguajnë kontribute. Përjashtimi i kësaj kategorie argumentohet në relacion do të rriste pensionistët aktiv në tregun formal të punës, do rregullonte barrën e dyfishtë ndaj tyre si dhe do të rriste të ardhurat e tyre.
Ndryshimet e tjera që ka paralajmëruar qeveria
Sipas kryeministrit Rama pensionet do të rriten progresivisht çdo vit, duke synuar trefishimin e tyre deri në vitin 2028 dhe katërfishimin në 2029. Rama është shprehur së fundmi se prindërit që kujdesen për këta fëmijë, do të përfitojnë pension, pasi sigurimet shoqërore do u paguhen nga shteti. Kjo ndihmë do të nis nga akti i radhës në qershor. “Kemi filluar një proces të pandalshëm rritje të pensioneve që do të sjellë çdo fillim viti, dyfishimin e rritjes. Pra, nëse në janar të këtij viti pensioni ju rrit X, në janar të vitit tjetër X-i do të jetë dyfish; në janarin e 2028-s X-i do të jetë trefish; në janarin e 2029-s X-i do të jetë katërfish dhe do të arrijmë në ato nivele që kemi marrë përsipër të arrijmë edhe me pensionistët.
E kemi ditur ne madje dhe e kemi thënë më parë, por do ta realizojmë tani, që kujdestarët, prindër apo kujdestarë të afërm, familjarë e tjerë, e tjerë, të fëmijëve me aftësi të veçanta, kemi shumë fëmijë me aftësi të veçanta që kanë nevojë për kujdes të drejtpërdrejtë, kemi shumë njerëz që kanë nevojë për kujdestarë e tjerë, e tjerë dhe që janë të detyruar të qëndrojnë në shtëpi, të kujdesen për njeriun e afërt, për fëmijën, nuk mundet dot që për këtë shkak të penalizohen dhe të mbeten pa pension nesër. Kështu që do t’ua paguajë shteti sigurimet shoqërore dhe kjo do të fillojë nga akti i ardhshëm normativ i qershorit. Ashtu sikundër, kemi thënë dhe tani do ta realizojmë edhe dyfishimin e shpërblimit për prindërit që kujdesen për fëmijët me nevoja të veçanta, për nënat në radhë të parë, diçka që është e mirëpritur patjetër nga prindërit, diçka që patjetër do ishte mirë të ishte bërë më përpara, por mundësitë nuk kanë qenë. Pra, po ngremë një ekonomi që po rrit mundësitë, kjo është shumë e rëndësishme dhe ajo që është inkurajuese, është që rritja vazhdon të jetë e qëndrueshme”, tha Rama.
Comments are closed.