Ish-ministrja socialiste dhe deputetja e Partisë Socialiste, Elisa Spiropali ka konfirmuar për herë të parë se është duke u punuar për një draft që lidhet me “Shqipërinë e Re”.
Pas reagimeve dhe diskutimeve të shumta në rrjetet sociale gjatë javëve të fundit ku është shprehur në mbështetje të protestës së qytetarëve dhe kërkesës së tyre për një “Shqipëri të re”, Spiropali u ndal shkurtimisht përpara mediave ku foli për herë të parë për këtë çështje.
Ajo konfirmoi se puna për draftin ka nisur, por theksoi se fokusi nuk duhet të jetë te momenti i publikimit, por te përmbajtja dhe qëllimi i tij.
“Jemi duke punuar për draftin për Shqipërinë e Re. E rëndësishme është ajo që do të bëjmë për Shqipërinë. Unë jam në Partinë Socialiste, kam qenë në Partinë Socialiste dhe do të jem në Partinë Socialiste. Në PS do të jenë të gjithë ata që kërkojnë një Shqipëri më të mirë, e kanë bërë dhe po e bëjnë”, deklaroi Spiropali.
Megjithëse konfirmoi se puna për draftin është në zhvillim, Spiropali nuk dha një datë se kur ai do të prezantohet publikisht, duke lënë të kuptohet se prioritet mbetet përmbajtja dhe vizioni që do të përmbajë dokumenti.
Deklarata e Spiropalit vjen në një moment kur protestat në vend kanë hyrë në ditën e 31-të. KËtë të martë protestuesit janë mbledhur para ambienteve të Kuvendit, ndërkohë si rrjedhojë deputetët socialistë vendosën që të paraqiteshin në sallë 30 minuta më parë me qëllim për të shmangur incidentet e mundshme.
Protestuesit e parë janë mbledhur mëngjesin e sotëm para godinës së Kuvendit, ku në orën 10:00 është parashikuar të zhvillohet seanca plenare.
Tubimi ishte paralajmëruar një natë më parë nga organizatorët gjatë protestës së mbajtur para Parlamentit, të cilët u bënë thirrje qytetarëve të rikthehen edhe këtë paradite për të protestuar.
Ndërkohë, deputetët e Partisë Socialiste kanë mbërritur në Kuvend rreth 30 minuta përpara nisjes së seancës, për shkak të protestës së njoftuar jashtë godinës.
Protestuesit kanë nisur të grumbullohen para Parlamentit, ndërsa dëgjohen thirrje si: “Rama, jep dorëheqjen”.
