Studentët kanë njoftuar një protestë kombëtare që do të mbahet të martën, më 13 tetor, në orën 14:00, përpara Ministrisë së Arsimit në Tiranë. Njoftimi u bë publik përmes një pankarte të shfaqur gjatë ditës së 133-të të protestës së përditshme kundër qeverisë në kryeqytet.
Në pankartë, studentët shkruajnë se protestojnë “për çdo gjë që nuk funksionon” dhe për gjithçka që duan të jetë ndryshe. Ata deklarojnë se nuk pranojnë më atë që e quajnë përbuzje dhe neglizhencë ndaj zërit të tyre, ndërsa mesazhi mbyllet me thirrjen: “E ardhmja e Shqipërisë është në dorën tënde”. Në afishe shfaqet edhe një ndërtesë me një banderolë të madhe ku shkruhet “Studentët: Ju erdhi fundi!” dhe “Albania is not for sale”, slogan i fundit që shihet edhe në pankartat e protestuesve në rrugët e Tiranës.
Thirrje edhe për bojkot të mësimit
Data e 13 tetorit ishte paralajmëruar që më herët. Gjatë protestës së 126-të, kur marshimi u ndal pranë Ministrisë së Arsimit në rrugën e Durrësit, studentëve iu bë thirrje të bojkotonin mësimin në shenjë proteste. Thirrja lidhej me nisjen e vitit të ri akademik, më 5 tetor, dhe aty u njoftua edhe rikthimi para ministrisë për një tubim të posaçëm.
Me fillimin e vitit akademik, studentët dhe të rinjtë janë bërë më të dukshëm në tubimet që zhvillohen çdo ditë në Tiranë. Organizatorët kanë kërkuar pjesëmarrje të gjerë të brezit të ri për protestën e së martës.
Protesta e përditshme ka hyrë tashmë në muajin e pestë. Kërkesa kryesore e protestuesve mbetet dorëheqja e kryeministrit Edi Rama dhe largimi i qeverisë. Gjatë këtyre muajve janë ngritur edhe kërkesa për një qeveri teknike tranzitore, për ndryshime në sistemin politik dhe zgjedhor, si dhe kundërshtime ndaj disa ligjeve dhe nismave qeveritare.
Comments are closed.