Shqipëria pritet të përjetojë sot ditën më të nxehtë të këtij sezoni, me temperatura që në disa zona të vendit do të shkojnë deri në 40 gradë Celsius.
Meteorologia Tanja Porja ka njoftuar se për temperaturat ekstreme është shpallur alarm i kuq, duke theksuar se kjo ditë shënon fillimin e kulmit treditor të valës së të nxehtit.
Sipas saj, në Shkodër sot priten 40°C, ndërsa në pjesën tjetër të vendit temperaturat do të variojnë nga 36 deri në 39°C, çka e bën këtë një ditë shumë të nxehtë.
Porja sqaroi gjithashtu se mëngjesi ka qenë relativisht i freskët, me vlerën minimale që ka zbritur në 16°C në zonat e thella malore, ndërsa në pjesën perëndimore temperaturat e mëngjesit janë luhatur mes 21 dhe 24°C.
Ajo bëri të ditur se edhe sot do të ketë rrebeshe të izoluara, kryesisht në zonat lindore dhe juglindore të vendit, ndërsa në pjesën më të madhe të territorit do të mbizotërojnë kthjellimet dhe moti me diell.
“Kaq kuq e gjithë dita. Alarmi i kuq sot. Po 40° presim sot në Shkodër. Pjesa tjetër 36, 38, 39°C. Një ditë mjaft e nxehtë.
Megjithatë mëngjesi i sotëm paraqitet relativisht i freskët me një vlerë minimale rreth 16° në zonat e thella malore.
Ndërkohë sot në mesditë presim 40°, sikundër e thamë, në zona krejt të izoluara. Fillon sot kulmi treditor i valës së të nxehtit pasi kemi sot 40, nesër e pasnesër po ashtu dhe presim që nga e marta e javës tjetër të vijojë të ulet ndjeshëm temperatura në territor”, tha Porja.
“Duke iu afruar orëve të mesditës kemi një zhvillim të vranësirave në juglindje ku do të prodhohen rrebeshe afatshkurtra. Dielli do të vijojë të mbizotërojë në vijën bregdetare”, u shpreh Porja në emisionin “Dita Jonë” në A2 CNN.Alarm i kuq për vapën ekstreme, termometri pritet të ngjitet deri në 40 gradë në Shqipëri
