Të paktën 27 persona kanë humbur jetën si pasojë e një zjarri të fuqishëm që përfshiu një lokal nate në Bangkok, kryeqytetin e Tajlandës, në orët e para të mëngjesit të së henës.
Sipas autoriteteve tajlandeze, zjarrfikësit mbërritën në vendngjarje pak pas mesnatës, ku u përballën me flakë të mëdha që kishin përfshirë hyrjen kryesore të lokalit. Pamjet e publikuara në rrjetet sociale tregojnë klientë që përpiqen të largohen mes tymit dhe flakëve, ndërsa disa prej tyre shihen të përfshirë nga zjarri.
Kryeministri i Tajlandës, Anutin Charnvirakul, konfirmoi se deri më tani janë nxjerrë 27 trupa nga godina, ndërsa disa persona të tjerë janë transportuar në spital me lëndime të ndryshme. Autoritetet vijojnë kërkimet, pasi raportohet se disa persona rezultojnë ende të zhdukur.
Sipas dëshmive paraprake, zjarri dyshohet se ka nisur nga paneli elektrik i lokalit. Një muzikant që po performonte në momentin e ngjarjes u tha hetuesve se, pas shpërthimit të flakëve, situata doli jashtë kontrollit brenda pak sekondash.
“Pas zjarrit pati shpërthime dhe të gjithë u përpoqën të largoheshin nga tymi dhe flakët. Shumë prej tyre u drejtuan nga pjesa e pasme e ndërtesës dhe u strehuan në tualete, ku më vonë u gjetën shumica e viktimave,” deklaroi kryeministri.
Lokali, i njohur si “Rong Beer Na Lat Phrao”, ndodhet në distriktin Chatuchak dhe konsiderohet një nga ambientet më të frekuentuara të zonës.
Zjarrfikësit arritën ta vinin zjarrin nën kontroll rreth 30 minuta pas mbërritjes në vendngjarje. Fotografitë e publikuara pas shuarjes së flakëve tregojnë ambientin plotësisht të shkrumbuar, me tavanin e shembur dhe dëme të mëdha materiale.
Shkaqet e plota të zjarrit mbeten ende nën hetim, ndërsa autoritetet tajlandeze kanë nisur verifikimet për të përcaktuar nëse janë respektuar standardet e sigurisë në këtë objekt.JOQ
