Një tragjedi e rëndë është regjistruar në ujërat në jug të ishullit të Kretës, ku 12 emigrantë u gjeten te vdekur ne nje gomone ne det, rreth 15 milje detare në jug-jugperëndim të Kaloi Limenes.
Sipas informacioneve paraprake, gomonia u pikas nga një anije transporti mallrash me flamur maroken, e cila po lundronte në zonë. Menjëherë u organizua një operacion kërkim-shpëtimi nën koordinimin e Qendrës së Përbashkët të Koordinimit të Kërkimit dhe Shpëtimit.
Në operacion u shpëtuan 18 emigrantë, ndërsa nga gomonia u nxorën edhe 12 trupa të pajetë. Të mbijetuarit u transferuan në një mjet lundrues të Rojës Bregdetare greke, i cili po drejtohet drejt portit të Agia Galinit.
Ndërkohë, në të njëjtën zonë detare janë zhvilluar edhe dy operacione të tjera për identifikimin dhe shpëtimin e emigrantëve.
Në rastin e parë, një mjet ajror i Frontex-it zbuloi një gomone me rreth 47 persona në bord, rreth 30 milje detare në jug të Kaloi Limenes. Emigrantët u shpëtuan nga një anije e forcave të Frontex-it dhe do të transportohen drejt portit të Kaloi Limenes.
Në operacionin e dytë, një dron i Frontex-it identifikoi një tjetër gomone me rreth 40 emigrantë, rreth 31 milje detare në juglindje të Kaloi Limenes. Edhe këta persona u morën në bord nga një anije e forcave evropiane.
Sipas bilancit paraprak, në tre operacionet e zhvilluara në jug të Kretës janë identifikuar gjithsej rreth 117 emigrantë. Prej tyre, 105 persona janë shpëtuar, ndërsa 12 janë gjetur të pajetë.
