Një ngjarje e rëndë ka ndodhur mbrëmjen e së mërkurës në fshatin Agonas të Kavajës, ku një 76-vjeçar dyshohet se ka vrarë me thikë vëllain e tij.
Sipas Policisë, rreth orës 20:30, shtetasi M. Rr., 76 vjeç, dhe vëllai i tij E. Rr., 74 vjeç, ndodheshin në arë duke mbledhur bazë ushqimore për blegtorinë, kur mes tyre dyshohet se ka ndodhur një konflikt.
Gjatë përplasjes, 76-vjeçari dyshohet se e ka goditur vëllain me mjet prerës. I plagosuri u nis menjëherë drejt spitalit për të marrë ndihmë mjekësore, por nuk mundi t’u mbijetojë plagëve dhe ndërroi jetë rrugës.
Njoftimi i policisë:
Plagosi me mjet prerës vëllain, i cili si pasojë e plagëve të marra humbi jetën rrugës për në spital, kapet dhe shoqërohet në Polici autori i dyshuar.
Rreth orës 20:30, në fshatin Agonas, Kavajë, dyshohet se, gjatë kohës që ndodheshin në arë duke mbledhur bazën ushqimore për blegtorinë, shtetasi M. Rr., 76 vjeç, ka goditur me mjet prerës (thikë) vëllain e tij, shtetasin E. Rr., 74 vjeç, i cili u transportua menjëherë për ndihmë mjekësore, por si pasojë e dëmtimeve të marra ka ndërruar jetë.
Shërbimet e Policisë kanë kapur dhe shoqëruar në Polici, për veprime të mëtejshme, autorin e dyshuar.
Grupi hetimor, nën drejtimin e Prokurorisë, po vijon veprimet hetimore për zbardhjen e rrethanave dhe dokumentimin e plotë ligjor të kësaj ngjarjeje.
