Një tragjedi ndodhi mëngjesin e së dielës në zonën e Akhisarit, në provincën e Manisës, në Turqi, ku një autobus turistik u përplas me një vinç, duke shkaktuar vdekjen e të paktën 11 personave dhe plagosjen e 27 të tjerëve.
Sipas mediave turke, përfshirë TRT Haber, aksidenti i rëndë ndodhi pranë pikës së pagesës së Akhisarit, në autostradën Gebze–Orhangazi–Izmir.
Në pamjet filmike nga vendngjarja, autobusi shihet i përmbysur. Ekipet e shpëtimit thyen xhamat e mjetit për të nxjerrë pasagjerët. Në vendngjarje mbërritën ekipet e emergjencës dhe disa ambulanca, ndërsa të plagosurit u transportuan në spitale për të marrë ndihmën mjekësore.
Deri më tani, shkaqet dhe rrethanat e aksidentit tragjik nuk janë bërë ende të qarta.
Reagimi i autoriteteve
Guvernatoria e Manisës publikoi një deklaratë lidhur me ngjarjen.
“Ekipet mjekësore dhe të shpëtimit janë dërguar në vendngjarje, ndërsa operacionet për shpëtimin e qytetarëve të prekur nga aksidenti nisën menjëherë. Si pasojë e aksidentit, 11 qytetarë humbën jetën, ndërsa 27 të tjerë u plagosën. Të plagosurit janë transportuar në spitale. Po e ndjekim nga afër situatën, në bashkëpunim me të gjitha institucionet përgjegjëse”, thuhet në deklaratë.
Edhe ministri i Brendshëm i Turqisë, Mustafa Çiftçi, reagoi përmes një postimi në rrjetet sociale.
Comments are closed.