Një lajm i trishtë për komunitetin e detarëve në Vlorë. Kapiten Pano Xhori, i cili ia kushtoi një pjesë të madhe të jetës detarisë dhe shërbimit në këtë sektor, është ndarë nga jeta.
Xhori ishte një emër i njohur në fushën e detarisë shqiptare, ndërsa gjatë karrierës së tij ka shërbyer edhe në Kapitenerinë e Portit të Vlorës.
Lajmi për ndarjen e tij nga jeta është shoqëruar me një mesazh prekës lamtumire nga gazetari Ergys Allushi, ku vlerësohen përkushtimi, profesionalizmi dhe cilësitë njerëzore të kapitenit.
Postimi i Allushit:
“Një tjetër detar u nis drejt lundrimit të përjetshëm.
Një nga ata burra që ia kushtuan jetën detit, uniformës dhe shërbimit ndaj Atdheut.
Një detar i përkushtuar, komandant i respektuar, njeri i urtë e fisnik, që la gjurmë te shokët dhe kolegët e tij.
Po largohet dalëngadalë një brez burrash që e kishin detin profesion, krenari e pjesë të shpirtit.
Një brez uniformash, anijesh, lundrimesh e kthimesh në port; një brez që la pas jo vetëm histori detare, por edhe miqësi, kujtime e vlera njerëzore të rralla.
Kapiten Pano Xhori përfundoi lundrimin e tij të fundit, por emri dhe kujtimi i tij do të mbeten në zemrat e atyre që e njohën, në historinë e detarisë shqiptare dhe në kujtesën e Vlorës.
U prehsh në paqe, Kapiten!
Deti që aq shumë deshe do të të mbajë gjithmonë në kujtesën e vet.
Historia vazhdon…”
Trishtim në Vlorë, ndahet nga jeta kapiten Pano Xhori, marinari që gjithë jetën ka bërë…
