Një histori që ka prekur zemrat e mijëra shqiptarëve është kthyer në një shembull të jashtëzakonshëm solidariteti dhe humanizmi.
Vetëm pak orë pasi historia e 17-vjeçarit Erind Goçllari u bë publike, shqiptarë nga vende të ndryshme janë bashkuar për t’i ardhur në ndihmë atij dhe familjes së tij.
Sipas një postimi të publikuar nga JOQ Albania në Instagram, deri në momentin e raportimit janë mbledhur plot 109.233 paund, ose rreth 130.860 euro, përmes donacioneve të qytetarëve.
Shuma e konsiderueshme është grumbulluar brenda një kohe të shkurtër, duke dëshmuar mbështetjen e madhe që historia e të riut ka marrë në rrjetet sociale.
“Ka momente kur fjalët nuk mjaftojnë për të përshkruar madhështinë e zemrës së shqiptarëve. Dhe ky është një prej tyre!”.
Në postim theksohet se pas çdo kontributi qëndron një njeri që ka vendosur të mos qëndrojë indiferent përballë vështirësive të familjes.
“Sot Erindi nuk është vetëm. Pas tij qëndrojnë mijëra shqiptarë që dëshmuan se solidariteti nuk njeh kufij dhe se, kur bëhemi bashkë, mund të ndryshojmë jetën e dikujt”, vijon reagimi.
Faqja ka falënderuar gjithashtu të gjithë qytetarët që kanë dhuruar para, kanë shpërndarë historinë dhe kanë kontribuar në përhapjen e thirrjes për ndihmë.
“Sot nuk u mblodhën thjesht para. U mblodh dashuri, humanizëm dhe shpresë për një familje që ka nevojë për to”, thuhet më tej në postim.
Historia e Erind Goçllarit është kthyer kështu në një shembull të fuqisë së solidaritetit, duke treguar se një thirrje për ndihmë mund të bashkojë mijëra njerëz brenda pak orësh.
