Venusi ka hyrë në retrogradë në shenjën e Akrepit, një periudhë që sipas astrologes Esmeralda Petrela sjell më shumë reflektim emocional, shpirtëror dhe mendor. Gjatë kësaj faze, njerëzit mund të përballen me aspekte të vetes që zakonisht preferojnë t’i shmangin, ndërsa disa situata mund të zvarriten ose të mos zhvillohen sipas pritshmërive. Venusi pritet të rikthehet në shenjën e Peshores në fund të tetorit.
Duke folur në emisionin “Mes’dritë” në Vizion Plus, astrologia veçoi datat 7 dhe 10 tetor si momente më të favorshme të javës. Sipas saj, më 7 tetor katër planetë krijojnë raporte të mira, ndërsa më 10 tetor Hëna e Re në Peshore sjell më shumë lehtësim dhe mundësi për sqarime në dashuri e komunikim.
Parashikimi për 12 shenjat
Dashi
Sot Hëna ndodhet në shenjën e Luanit. Për shkak të Venusit në retrogradë, Dashi mund të ndiejë se nuk do të tolerojë më asgjë dhe do të thotë hapur atë që dëshiron. Ndihet me vetëbesim dhe vendos kufij ndaj njerëzve që e kritikojnë apo përpiqen ta ulin. Megjithatë, gjatë ditës mund të ndryshojë mendje dhe të tregojë më shumë tolerancë, pasi do të kuptojë se kjo mund t’i sjellë përfitime. Nëse kërkon të sqarojë diçka me shefin ose një koleg, mund të befasohet pozitivisht nga një përgjigje apo propozim i mirë. Ditë shumë e favorshme për Dashin.
Demi
Demi mund t’i ndiejë njerëzit e afërt, partnerin ose personat e rëndësishëm pak më të largët apo të distancuar, fizikisht, emocionalisht ose mendërisht. Kjo lidhet me faktin se Afërdita, planeti i tij drejtues, ndodhet në shenjën e kundërt, Akrepin. Personi tjetër mund të ketë nevojë për kohën dhe ekuilibrin e vet. Demi duhet të tregojë durim dhe të merret më shumë me veten dhe punët e tij, pa kërkuar me ngulm vëmendjen e të tjerëve.
Binjakët
Binjakët mund të përjetojnë habi ose një lloj paragjykimi ndaj një personi të afërt, si prindi, nëna apo motrat dhe vëllezërit më të mëdhenj. Ata presin një sjellje të caktuar, ndërsa personi tjetër po vepron sipas lirisë dhe dëshirave të veta. Binjakët duhet të kuptojnë se njerëzit kanë shumë shtresa, mund të jenë kontradiktorë dhe të ndryshojnë perspektivë. Pranimi i tyre ashtu siç janë do të ndihmojë në shmangien e konflikteve.
Gaforrja
Gaforrja ndikohet pozitivisht nga Afërdita në retrogradë në Akrep, një tjetër shenjë uji. Mund të përjetojë më shumë romancë dhe afërsi intime në çift, me mirëkuptim reciprok. Megjithatë, rreth saj mund të shfaqen pengesa praktike, si vonesa në udhëtime, dokumente apo çështje të përditshme që nuk ecin siç duhet. Dita është sa e ëmbël, aq edhe e athët: marrëdhënie të mira në çift, por disa vështirësi praktike.
Luani
Me Hënën në shenjën e tij, Luani është sot më emocional, por edhe më perceptues ndaj ndjenjave të të tjerëve. Mund të jetë më simpatik dhe më modest se zakonisht. Pyetja kryesore për të gjatë kësaj periudhe është: “Ku është shtëpia ime?”. Luani do të kërkojë një ndjesi më të madhe rehatie dhe përkatësie, qoftë përmes blerjes apo marrjes me qira të një shtëpie, ndryshimit të lagjes, apo duke riorganizuar ambientin ku jeton ose punon.
Virgjëresha
Virgjëresha do të dëshirojë të tërhiqet, të qetësohet ose të rrëfehet me dikë, por njerëzit përreth mund t’i kërkojnë vazhdimisht vëmendje. Kjo mund ta bëjë të ndihet e irrituar dhe e frustruar. I duhet pak durim dhe më shumë hapësirë për veten. Sipas astrologes, ditët më të favorshme për Virgjëreshën gjatë kësaj jave janë 7 dhe 10 tetori.
Peshorja
Peshorja ndodhet në muajin e ditëlindjes, por Afërdita, planeti i saj drejtues, në retrogradë në Akrep mund të sjellë disa kufizime ose pasiguri financiare dhe në lidhje me gjërat që zotëron. Sot mund ta ketë më të vështirë të tregojë anën e saj diplomatike. Megjithatë, kjo situatë është e përkohshme. Hëna në Luan e ngre moralisht dhe e afron me vizionin dhe misionin e saj. Nga jashtë mund të duket e kënaqur, edhe pse brenda mund të ketë disa trazira.
Akrepi
Akrepi ka dëshirë të pushojë dhe mund të preferojë të shtyjë orarin e gjumit. Ndryshe nga Virgjëresha, nuk ka shumë dëshirë të flasë me të tjerët dhe do të fokusohet te puna, karriera, ambicia dhe imazhi personal. Mund të marrë një ndihmë konfidenciale nga një person me autoritet që e vlerëson. Ka shumë energji për punën, por jo aq shumë energji sociale, ndaj pjesën tjetër të ditës preferon ta kalojë në qetësi.
Shigjetari
Shigjetari ndjen shumë “zjarr” dhe ngrohtësi shpirtërore falë Hënës në Luan. Është një ditë shumë e mirë për të bërë plane udhëtimi, për studime, kurse apo certifikime. Nëse dikush i kërkon këshilla për karrierën ose arsimin, Shigjetari mund të japë orientime shumë të mira. Shfaq krenari për veten, është aktiv, dinamik dhe plot iniciativë.
Bricjapi
Bricjapi di të nxjerrë më të mirën nga burimet dhe financat e tij. Dita është e karakterizuar nga rutina, por kjo qetësi i pëlqen dhe nuk e shqetëson. Përkundrazi, e shfrytëzon këtë periudhë për t’u kujdesur për shëndetin mendor dhe fizik, ushqimin dhe aktivitetin fizik. Një ditë e mirë për të vendosur rregull dhe ekuilibër në përditshmëri.
Ujori
Me Hënën në shenjën e tij të kundërt, Luanin, Ujori mund të përballet me keqkuptime në komunikim ose në mesazhe. Do t’i duhet të sqarojë më mirë atë që ka dashur të thotë. Mund të ndihet gjithashtu i kufizuar, pasi dëshiron më shumë aventura dhe dinamizëm, por gjërat nuk realizohen menjëherë. Disa Ujorë mund të demotivohen, ndërsa të tjerë do ta përdorin këtë periudhë për të dhënë maksimumin në punën e tyre rutinë.
Peshqit
Peshqit sot janë më me këmbë në tokë dhe shfaqin më shumë anën e shenjës së tyre të kundërt, Virgjëreshës. Vërejnë çdo detaj dhe problem përreth dhe nuk hezitojnë të japin vërejtje. Kur kritikojnë, mund të jenë shumë të drejtpërdrejtë dhe të ashpër. Megjithatë, sipas parashikimit, kritikat e tyre mund të jenë të bazuara në atë që realisht shohin dhe përjetojnë.
Comments are closed.