Dy persona kanë humbur jetën dhe katër të tjerë, mes tyre dy të mitur, kanë mbetur të plagosur rëndë në një incident me armë zjarri të regjistruar në komunën El Ejido, në provincën Almería, në orët e vona të së hënës.
Garda Civile ka hapur një hetim për të sqaruar ngjarjen, ndërsa ka vendosur një operacion të gjerë sigurie në zonë. Autori i të shtënave u arrestua në orët e para të së martës, pasi u vetëdorëzua në komisariatin e Policisë Lokale. Dy viktimat janë prindërit e tij.
Burime të Gardës Civile kanë bërë të ditur se njëri nga të miturit e plagosur është vetëm shtatë muajsh dhe ndodhet në gjendje kritike. Bëhet fjalë për djalin e autorit të ngjarjes. Një tjetër i plagosur është një fëmijë dyvjeçar, ndërsa dy të plagosurit e tjerë, të cilët ndodhen të shtruar në spital, janë një grua në gjendje të rëndë dhe një burrë 60-vjeçar.
Shërbimi i Emergjencave 112 Andalucía mori disa telefonata rreth orës 23:15 të së hënës, ku njoftohej se ishin dëgjuar disa të shtëna në zonën El Canalillo, shumë pranë Balanegra-s dhe brenda territorit administrativ të El Ejido-s, sipas burimeve të këtij institucioni.
Në vendngjarje u dërguan forca të shumta të Policisë Lokale, Policisë Kombëtare dhe Gardës Civile, e cila angazhoi edhe pjesëtarë të Grupit të Veprimit të Shpejtë (GAR) dhe mori përsipër hetimin e çështjes.
Vrau prindërit dhe plagosi foshnjën 7 muajshe, detaje nga krimi i
Në zonë mbërritën gjithashtu ekipet mjekësore. Ata konstatuan vdekjen e dy personave, të cilët rezultuan të jenë prindërit e autorit të të shtënave. Po ashtu kishte edhe katër persona të plagosur rëndë, të cilët u transportuan në spitalet Poniente dhe Torrecárdenas. Mes tyre ndodheshin dy fëmijë, njëri prej të cilëve është djali i të arrestuarit. Njëri nga të rriturit ndodhet në repartin e kujdesit intensiv.
Autori i dyshuar i të shtënave ishte larguar nga vendngjarja, por në orët e para të së martës u vetëdorëzua në ambientet e Policisë Lokale të El Ejido-s, sipas agjencisë Europa Press.
