Zv/kryeministrja Albana Koçiu prezantoi sot detajet kryesore të projektbuxhetit për vitin 2027. Në një intervistë për RTSH, Koçiu e vuri theksin te karakteri social i buxhetit, lehtësimin e paketës fiskale për qytetarët dhe biznesin, si dhe masat e ndërmarra për pensionistët, çiftet e reja dhe studentët. Projektbuxheti i vitit 2027, i cili pritet të kalojë për miratim në Kuvend, kap vlerën e rreth 10 miliardë eurove.
Zëvendëskryeministrja Koçiu nënvizoi se vlera në shifra nuk është qëllim në vetvete, por se si ky buxhet përkthehet në mirëqenie, shërbime cilësore, investime në infrastrukturë kritike dhe përmbushjen e detyrimeve për integrimin evropian të Shqipërisë. “Është një buxhet që prek shumë mbrojtjen sociale, të gjitha nivelet ose të gjitha grupmoshat brenda familjes, që nga fëmijët deri te të moshuarit, pa lënë mënjanë studentët, çiftet e reja dhe ata që kanë probleme sociale dhe nevoja të veçanta speciale”, theksoi zv.kryeministrja.
Koçiu tha se projektbuxheti 2027 ka në themel filozofinë që Partia Socialiste ka në boshtin e saj qeverisës, që kush fiton më shumë paguan më shumë. Këtë filozofi është munduar ta trajtojë edhe ky buxhet me disa politika shumë të targetuara, me uljen e TVSH-së sa i përket produkteve të shportës, por edhe me rritjen e TVSH-së në disa produkte të tjera. “Ata që kanë paga më të larta do të taksohen dhe më shumë. Kjo për të bërë një rishpërndarje të të ardhurave dhe për të çuar aty ku duhet, aty ku ka nevojë mbështetjen e financiare të buxhetit të shtetit”, tha Koçiu.
Një nga pikat e diskutuara në paketën fiskale 2027 është ulja e TVSH-së në 6% për 54 produkte të shportës. Duke marrë një shembull konkret, Koçiu shpjegoi se “një produkt i shportës në qoftë se sot kushton 120 lekë, me shkuarjen e TVSH-së 6% do të shkojë në 106 lekë, pra jemi tek një kursim prej afro 11,7%”. Për moshën e tretë, qeveria synon që brenda vitit 2029 pensioni minimal të arrijë në 40.000 lekë. Koçiu vuri në dukje përgjegjësinë ndaj kësaj kategorie, duke e konsideruar “një borxh moral ndaj moshës së tretë”.
Ajo vuri në dukje se buxheti do të targetojë dyfishimin e bonusit mujor që u jepet pensionistëve. ”Të gjitha ato pensione të plota, pra që kanë mbushur dhe vitet e punës, do të kenë një dyfishim të bonusit. Në rastet kur kemi të bëjmë me një mbështetje 1.800 lekë bonus, do të shkojë 3.600 lekë bonus mujor”, deklaroi ajo.
Koçiu shtoi se kjo mbështetje do të jetë edhe për pensionet rurale, ku shtesa mujore e bonusit do të jetë nga 1.000, në 2.000 lekë. “Ndërkohë që një risi tjetër është që indeksimi që ndodhte çdo vit, zakonisht në muajin tetor, këtë vit indeksimi i pensioneve u bë në muajin korrik dhe vitin e ardhshëm do të fillojë nga muaji prill”, deklaroi zv.kryeministrja. Koçiu preku po ashtu politikat e reja për familjen dhe arsimin, ku përfshihet programi “Pas shkolle” deri në orën 17:00, mbështetje financiare mujore për fëmijët nga lindja deri në moshën 5 vjeç, si dhe 4 mijë kredi të lehtësuara për strehim me interes 0% për vlera deri në 60.000 euro. Ajo theksoi se studentët nga familjet në nevojë ekonomike (rreth 5400 përfitues) do të shohin rritjen e mbështetjes mujore nga 10.000 lekë, në 25.000 lekë.
