Dubai është vënë në alarm pas raportimeve për shpërthime të forta në qiell pranë zonës ikonike Palm Jumeirah, duke ngritur dyshime për aktivizimin e sistemeve të mbrojtjes ajrore.
Sipas mediave dhe dëshmive të banorëve, incidentet e para janë regjistruar rreth 20 minuta më parë. Dëshmitarët raportojnë se kanë dëgjuar të paktën katër deri në pesë shpërthime brenda një periudhe prej 15 minutash.
Një person që ndodhej pranë kompleksit luksoz FIVE Palm Jumeirah deklaroi se ka parë një përgjim të mundshëm në ajër. “Pamë diçka në qiell dhe më pas dëgjuam disa shpërthime të njëpasnjëshme. Dukej sikur ndodhi mbi Palm Jumeirah”, tha ai.
Një video e publikuar nga mediat greke tregon flakë dhe shpërthime në qiell, që dyshohet se lidhen me ndërhyrjen e sistemeve mbrojtëse ajrore. Megjithatë, deri në këto momente nuk ka një deklaratë zyrtare nga autoritetet e Emirateve të Bashkuara Arabe.
Palm Jumeirah, një nga projektet më të njohura të Dubait, është një ishull artificial në formë palme që strehon dhjetëra hotele luksoze, rezidenca dhe mijëra banorë. Zona konsiderohet simbol i zhvillimit turistik dhe ekonomik të Emirateve.
Situata mbetet e paqartë, ndërsa pritet një reagim zyrtar për të sqaruar natyrën e shpërthimeve dhe nëse bëhet fjalë për një incident ushtarak apo një alarm të rremë.
Comments are closed.