“MaShqip”
Katër vite pas zhdukjes misterioze të Ervis Martinajt, rikthehet në ekran Sadete, e njohur si Deta Kokomani, ish-missi që kishte një marrëdhënie me bosin e lojërave të fatit dhe që ishte një nga personat pranë tij vetëm pak ditë përpara se ai të humbiste çdo gjurmë.
Kokomani është shfaqur së fundmi në podcastin “Inspire” të Alketa Vejsiut. Një rrëfim i gjatë për jetën e saj, familjen, suksesin, biznesin e verërave, karrierën në botën e spektaklit dhe eksperiencën e saj me Miss Universe. Ajo tregoi edhe ëndrrën për të krijuar brandin e saj të kozmetikës. Foli për dashurinë, dhimbjet që ajo mund të sjellë dhe madje edhe për “princin” që ëndërron të ketë në krah.
Por gjatë gjithë bisedës nuk u përmend një emër që katër vite më parë e vendosi Kokomanin në qendër të një prej dosjeve më misterioze në Shqipëri: Ervis Martinaj. As Kokomani nuk foli për të dhe as Alketa Vejsiu nuk e pyeti. Në fakt, historia mes tyre nuk është thjesht një raportim mediatik. Një pjesë e saj gjendet në dëshminë që vetë Kokomani dha para hetuesve më 15 gusht 2022, vetëm pak ditë pasi familja e Martinajt kishte humbur kontaktet me të.
Sipas dëshmisë së pasqyruar më vonë edhe në vendimin e Gjykatës së Lartë për ish-efektivin Jeton Lami, Kokomani tregoi se ishte njohur me Martinajn në janar 2022. Gjithçka kishte nisur në Instagram. Martinaj përdorte një adresë me emrin “King Simba”, ndërsa si fotografi profili kishte një luan. Pas disa komunikimeve, takimi i tyre i parë kishte ndodhur më 7 janar 2022, përpara hotel “Palace” në Durrës.
Sipas saj, Martinaj kishte mbërritur vetëm me një BMW Seria 7. Të dy ishin nisur drejt Tiranës, por për shkak të trafikut ishin kthyer, kishin pirë kafe në “Arbëria Palace” në Fushë-Milot dhe më pas kishin drekuar në Patok, në lokalin e hallës së Martinajt. Pas atij takimi, marrëdhënia kishte vazhduar.
Por për hetuesit rëndësi të veçantë morën lëvizjet e fillimit të gushtit 2022, vetëm pak ditë përpara zhdukjes së tij.
Në dëshminë e saj, Kokomani tregoi se më 5 gusht 2022, rreth orës 17:00, ishte nisur me taksi nga Durrësi drejt Tiranës. Ajo kishte komunikuar me Martinajn në Telegram dhe fillimisht kishte shkuar për të parë një shtëpi që mendonte ta merrte me qira.
Më pas kishte marrë një tjetër taksi dhe kishte shkuar pranë spitalit “Hygeia”, pasi Martinaj i kishte shkruar se po e priste atje. Ervis Martinaj ndodhej në një “Audi A8” me targa të huaja. Por makinën nuk e drejtonte ai. Në timon ishte Jeton Lami, në atë kohë efektiv i njësisë së kërkimit “FAST” të Policisë së Shtetit, i cili më vonë do të merrej i pandehur për “shpërdorim detyre” pikërisht për lëvizjet e Martinajt në kohën kur ky ishte në kërkim. Martinaj ishte ulur në sediljen e parë të pasagjerit, ndërsa Kokomani hipi pas.
Nga Tirana u nisën drejt Durrësit, bënë një xhiro deri në Golem dhe më pas shkuan në hotel “Adriatik”. Sipas dëshmisë së Kokomanit, dhoma ishte rezervuar nga personi që i shoqëronte, Jeton Lami. Ajo dhe Martinaj fillimisht qëndruan në barin e hotelit dhe më pas u ngjitën në dhomë. Aty qëndruan së bashku gjatë natës. Kokomani deklaroi se u larguan nga hoteli rreth mesditës së 6 gushtit 2022.
Ky është një nga episodet e fundit të dokumentuara të marrëdhënies së saj me Martinajn përpara zhdukjes së tij.
Vetëm tre ditë më vonë, më 9 gusht, familjarët e Martinajt kanë deklaruar se kanë pasur komunikimet e fundit me të. Pas kësaj, telefoni heshti dhe Ervis Martinaj nuk u pa më publikisht. Pikërisht për shkak të afërsisë kohore me zhdukjen, Kokomani u mor në pyetje më 15 gusht dhe hetuesit rindërtuan komunikimet, takimet dhe lëvizjet që ajo kishte bërë me Martinajn.
Ajo është pyetur si person që kishte dijeni dhe që kishte qenë pranë tij në ditët përpara humbjes së kontakteve. Por katër vite më vonë kontrasti është i fortë. Vajza që në dosjen e vitit 2022 tregonte para hetuesve për “King Simbën”, Instagramin, Telegramin, udhëtimet me Martinajn dhe natën në hotel “Adriatik”, është rikthyer përpara kamerave për të treguar një histori krejt tjetër. Sot ajo flet për suksesin, familjen, verërat, kozmetikën, Miss Universe dhe të ardhmen. Flet edhe për dashurinë dhe “princin” që ëndërron. Por nuk flet për Ervis Martinajn. Dhe as Alketa Vejsiu, gjatë rrëfimit, nuk e pyeti për marrëdhënien me të, natën e kaluar në hotel “Adriatik” apo për atë që Kokomani kishte treguar katër vite më parë para hetuesve.
Ndërsa Deta Kokomani ka vazhduar jetën dhe karrierën e saj, misteri i atyre ditëve të gushtit 2022 vazhdon. Çfarë ndodhi me Ervis Martinajn pas komunikimit të fundit me familjen më 9 gusht? Katër vite më vonë, kjo pyetje vazhdon të mbetet pa një përgjigje përfundimtare.
Comments are closed.