Studentët kanë nisur paraditen e kësaj të shtune protestën e radhë në Tiranë, në ditën e pesë të saj, duke nisur fillimisht nga rruga përballë Ministrisë së Arsimit, ndërsa më vonë ashtu siç ka ndodhur ditët e kaluara, do të shpërndahet në zona të ndryshme të kryeqytetit.
Sot, është paralajmëruar një revoltë edhe më e madhe, sepse në rrjetet sociale të rinjtë janë shprehur se diaspora është nisur drejt Tiranës.
Ndërkohë, forca të shumta policore janë vënë në gatishmëri në Ministrinë e Arsimit, por edhe pas godinave strategjike qeveritare, siç është Kryeministri. Edi Rama ka qenë deri në orën 11:00 në zyrën e tij.
Pamjet tregojnë momenti kur makina e tij, e shoqëruar nga eskorta e Gardës së Republikës dhe një patrullë e Policisë së Shtetit, largohet nga Kryeministria përgjatë bulevardit, në drejtim të shtëpisë së tij në Surrel.
Bie në sy, se sot në mbështetje të eskortës së kryeministrit Edi Rama, është dhe një njësi e Forcave Speciale RENEA. Furgoni ecën paralelisht me mjetet e tjera, duke ofruar më shumë siguri për kreun e ekzekutivit, për çdo situatë.
