Ministria e Turizmit, Kulturës dhe Sportit ka njoftuar ndarjen nga jeta të Leander Veizit, balerinit, koreografit dhe drejtori artistik të kompanisë së kërcimit të Teatrit Shtetëror të Regensburgut, në Gjermani.
Leander Veizi mbaroi studimet për balet në Tiranë dhe më pas u formua në Scuola del Balletto di Toscana. Në vitin 2011, ai iu bashkua kompanisë Gauthier Dance në Theaterhaus Stuttgart dhe, më pas u bë anëtar i ansamblit në Ballett Vorpommern dhe Tanz Theater Münster.
37 vjeçari ishte gjithashtu aktiv si koreograf; vepra e tij koreografike u shfaq në skena si Teatri Gallus në Frankfurt, Theater Vorpommern dhe Theater Münster.
Që nga sezoni 2022/23, Leander Veizi ishte anëtar i Teatrit Shtetëror të Regensburgut, dhe prej marsit të këtij viti, Drejtor Artistik i kompanisë së kërcimit të këtij institucioni.
Koreografi dhe balerini me origjinë shqiptare është gjetur i vdekur të hënën në apartamentin e tij në Regensburg të Gjermanisë, ku kishte ndërtuar një karrierë të rëndësishme artistike, duke mbyllur sytë përgjithmonë në moshën 37 vjeçare.
Lajmi për vdekjen e tij është konfirmuar nga Teatri Shtetëror i Regensburgut, ndërsa sipas Policisë gjermane, në vendin e ngjarjes nuk janë konstatuar shenja dhune dhe as indicie për përfshirjen e ndonjë personi tjetër.
