Teksa pritet Asambleja e PS-së të shtunën, ku mund të ketë edhe ndryshime në kabinetin qeveritar, sot ka pasur një lëvizje tjetër, por në rang zëvendësministri.
Sic mëson Lapsi.al është liruar nga detyra zv.ministri i Drejtësisë, Tedi Dobi dhe në vend të tij është emëruar Nadia Rusi. Ajo është lektore në Universitetin e Tiranës, Fakulteti i Drejtësisë, që nga viti 2010.
Rreth një vit më parë Rusi punoi si eksperte në komisionin e posacëm parlamentar për Mirëqeverisjen, Antikorrupsionin dhe Sundimin e Ligjit, i drejtuar nga Fatmir Xhafaj.
Nuk dihen arsyet e kësaj lëvivzje teksa kujtojmë se Dobi ka qenë negociatori me BE-në për Kapitullin 23; Gjyqësori dhe të Drejtat Themelore.
Tri modele kushtetuese, Kuvend me 100 deputetë, Senat me 20 anëtarë ose President të zgjedhur nga populli, ndërsa kryeministri merr vetë komandën e PS-së së Tiranës.
Edi Rama pritet të paraqesë një ofertë të fortë politike ndaj protestës gjatë Asamblesë së Partisë Socialiste, e cila do të mblidhet të shtunën në një resort në Gjirin e Lalzit.
Sipas informacioneve, kreu i mazhorancës do të hedhë për diskutim tri modele të reformës kushtetuese dhe politike.
Modeli i parë parashikon një Kuvend me 100 deputetë dhe krijimin e një dhome të lartë me 20 senatorë, të zgjedhur nga komunitetet vendore, akademike dhe fetare.
Modeli i dytë parashikon një sistem proporcional kombëtar dhe një Kuvend me 100 deputetë.
Modeli i tretë ruan Kuvendin me 100 deputetë, por parashikon zgjedhjen e Presidentit të Republikës drejtpërdrejt nga qytetarët. Në këtë variant, Presidenti nuk do të drejtonte qeverinë, por do të ushtronte kompetenca më të gjera në politikën e jashtme, drejtësi dhe shërbimet inteligjente.
Rama nuk pritet t’i paraqesë këto modele si propozime zyrtare të Partisë Socialiste. Ai do t’i hedhë në publik si skenarë për diskutim, duke ua drejtuar kryesisht protestuesve të flamingove dhe duke kërkuar përfshirjen e tyre në debat. Qëllimi është të matë reagimin publik përpara se PS-ja të marrë një qëndrim përfundimtar.
Kjo lëvizje zhvillohet paralelisht me paktin që duket se po formohet mes PS-së dhe PD-së në Komisionin e Reformës Zgjedhore. Dy partitë pritet të arrijnë një marrëveshje për uljen e numrit të deputetëve.
Në Asamble, Rama pritet të shpallë edhe procedurën për miratimin e kandidatëve socialistë për kryetarë bashkish në zgjedhjet e 9 majit. Kryesia e PS-së do të hartojë paraprakisht listën, ndërsa Asambleja e Përgjithshme do ta votojë atë haptazi dhe në bllok.
Kryeministri ka shmangur votimin individual të kandidatëve. Asambleja do të votojë të gjithë listën, duke u vendosur përballë vetëm dy alternativave, miratimit ose rrëzimit të saj të plotë. Kjo procedurë krijon presion të drejtpërdrejtë mbi anëtarët dhe mbron listën e Ramës nga kundërshtimet për emra të veçantë.
Pika më delikate e rendit të ditës lidhet me përplasjen e fundit me Erion Veliajn, situatën në Bashkinë e Tiranës dhe vendosjen e saj nën kontrollin politik të kryeministrit.
Sipas informacioneve, Rama nuk do ta përmendë drejtpërdrejt Veliajn. Ai pritet ta injorojë publikisht, por do të mbajë një fjalim të gjatë për gjendjen e Bashkisë së Tiranës. Kryeministri do ta akuzojë tërthorazi kryebashkiakun se e ka lënë qëllimisht administratën dhe shërbimet të degradojnë.
Rama pritet të drejtojë akuza edhe ndaj deputetëve dhe strukturave socialiste të Tiranës, të cilët, sipas tij, janë mjaftuar me konstatimin e problemeve pa ndërhyrë për zgjidhjen e tyre.
Kritikat pritet të prekin drejtpërdrejt Erion Braçen, por edhe deputetët e tjerë socialistë që kanë qëndruar indiferentë përballë krizës në kryeqytet.
Kreu i qeverisë pritet të shpallë veten drejtues të komanduar të Partisë Socialiste në Tiranë dhe të hapë menjëherë procesin për zgjedhjen e drejtuesve të rinj të strukturave vendore. Edhe në zgjedhjet e 9 majit, Rama do të mbajë vetë rolin e drejtuesit politik të qarkut.
Asambleja e Gjirit të Lalzit pritet të shërbejë kështu për tri qëllime: hapjen e debatit për ndryshimet kushtetuese, vendosjen e kandidatëve vendorë nën kontrollin e kryeministrit dhe marrjen prej tij të komandës së plotë mbi PS-në e Tiranës./Pamfleti
