Një ngjarje e trishtë është regjistruar në qytetin e Pogradecit, ku një 80-vjeçare është gjetur e pajetë në banesën e saj, në lagjen nr. 1 të qytetit.
Sipas informacioneve paraprake, bëhet fjalë për Zhuljeta Ruvinën, e cila dyshohet se kishte ndërruar jetë rreth tre ditë më parë, përpara se trupi i saj të zbulohej nga fqinjët.
Kanë qenë pikërisht banorët e zonës ata që, pasi kanë konstatuar mungesën e saj për disa ditë dhe kanë dyshuar se diçka mund të kishte ndodhur, kanë njoftuar Policinë. Pas mbërritjes së efektivëve dhe hapjes së derës së banesës, 80-vjeçarja është gjetur pa shenja jete.
Mësohet se e moshuara jetonte e vetme, pasi fëmijët e saj ndodheshin jashtë shtetit.
Kjo rrethanë bën edhe më të trishtë ngjarjen, pasi ajo dyshohet se ka qëndruar për disa ditë pa u vënë re nga të afërmit.
Ndërkohë, Policia ka nisur veprimet procedurale për dokumentimin e plotë të rastit. Pritet që ekspertiza mjekoligjore të ndihmojë në përcaktimin e shkakut dhe kohës së saktë të vdekjes.