Humb jetën papritur djali i John McCain, nuk bëhet i ditur shkaku
Douglas McCain, djali i madh i senatorit të ndjerë amerikan John McCain, është ndarë papritur nga jeta në moshën 66-vjeçare.
Lajmi u konfirmua përmes nekrologjisë së familjes, ku bëhet e ditur se ai ndërroi jetë të mërkurën, më 20 maj, ndërsa shkaku i vdekjes nuk është bërë publik.
Douglas Shepp McCain lindi më 4 tetor 1959 në Pensacola, Florida, dhe u rrit në Jacksonville. Ai përfundoi shkollën e mesme Episcopal High School në vitin 1977 dhe më pas studioi inxhinieri sistemesh në Universitetin e Virxhinias, ku ishte gjithashtu pjesë e programit ushtarak ROTC të Marinës.
Pas diplomimit në vitin 1982, ai iu bashkua Marinës Amerikane, ku shërbeu për gjashtë vite si pilot i avionëve sulmues A-6 Intruder. Më vonë ndërtoi një karrierë të gjatë në American Airlines, ku arriti të bëhej kapiten.
Douglas u adoptua nga John McCain pasi ky i fundit u martua me Carol Shepp në vitin 1965.
John McCain ishte një nga figurat më të fuqishme të politikës amerikane, senator për shumë vite në Arizona dhe kandidat republikan për president në zgjedhjet e vitit 2008. Ai ndërroi jetë në vitin 2018 pas një beteje me një formë agresive të kancerit në tru.
Lajmin e trishtë e ndau edhe Meghan McCain, vajza e senatorit, përmes një postimi emocional në rrjetet sociale.
“Jam thellësisht e trishtuar të ndaj lajmin për humbjen e papritur të vëllait tim Doug McCain. Ai ishte një njeri i mrekullueshëm, plot gëzim, që më ka mbështetur gjatë gjithë jetës sime. Sillte humor, energji dhe biseda të bukura kudo ku ndodhej,” shkroi ajo.
Në përshkrimin e familjes, Douglas kujtohet si një mik besnik, bir i përkushtuar, bashkëshort i dashur, baba dhe gjysh krenar.
Ai la pas bashkëshorten Ashley Jardine McCain, me të cilën kishte 40 vite martesë, dy fëmijët e tij, nipin, nënën Carol Shepp McCain, si dhe motra e vëllezër të tjerë.
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
