Gazetari dhe moderatori Blendi Fevziu ka publikuar në faqen e tij në Instagram një intervistë me kryeministrin Edi Rama, të realizuar në vitin 1994. Në atë intervistë, të zhvilluar nga Fevziu për gazetën “Aleanca”, Edi Rama rrëfente se ishte përgatitur të vdiste i varfër
Teksa ndalet në artin e tij, Rama thekson se dëshiron që artin e tij ta shkrijë me komponentët e tjerë të jetës së tij dhe sipas tij kjo është ajo që ai e quan lumturi. Ndërsa vdekjen e sheh si momentin kulmor të jetës.
“Nuk e di diferencë ka dhe është më mirë që këtë gjë ta thonë ata që më njohin, por unë them se e gjithë përpjekja që bëj është të mos ketë asnjë diferencë, përveç asaj që mua më shumë se arti si veprim faktik, konkret, më intereson arti si pjesë e jetës që bëj. Nëse do të arrij t’i shkrij një ditë këto të dyja, por me gjithë komponentët që përbëjnë jetën time, me siguri kjo do të jetë dita kur do të jem i lumtur. Padyshim, momenti më kulmor është vdekja”, deklaron Rama.
Ndërsa sa i përket shitjes së veprave të artit të tij, sipas kreut të qeverisë është arti komercial ai që dominon shitjet në gjithë botën, gjë që sipas tij nuk tregon cilësinë e veprave të artit.
“E para, suksesi është një gjë tepër relative, sepse mund të ekspozosh jashtë, por kjo nuk do të thotë se ke sukses. Dhe mund të mos ekspozosh kurrë atje, por kjo nuk do të thotë se je artist i pasuksesshëm. E dyta, ka shumë njerëz që e identifikojnë suksesin me sasinë e shitjes. Ky është një keqkuptim. Dihet se arti komercial, pa vlerë, është ai që blihet më shumë, sepse jo vetëm në Shqipëri dominon shija mediokre. Në të gjithë botën është njëlloj, budallenjtë janë mazhorancë dhe janë ata që blejnë dhe promovojnë artin komercial”, deklaron kryeministri para 32 vitesh.
Më tej, Fevziu shkruan se kryeministri më jetëgjatë i periudhës postkomuniste në Shqipëri e shihte ndryshe të ardhmen e tij para 32 vitesh.
“Intervistë me Edi Ramën për gazetën ‘Aleanca’, më 4 shkurt 1994. Si e parashikonte të ardhmen e tij…”, shkruan Fevziu në postimin e tij në Instagram.
Kujtojmë se pak ditë më parë, kryeministri Edi Rama, gjatë një interviste për “Koha Jonë”, rrëfeu eksperiencën e tij në gazetari dhe shkrimet e tij gazetareske.
