Një ngjarje e rëndë është regjistruar mesditën e kësaj të shtune, 14 nëntor, në zonën e Zefyrit, në Atikë të Greqisë, ku dy zjarrfikës kanë humbur jetën gjatë operacionit për shuarjen e një zjarri në një ndërtesë të braktisur. Sipas informacioneve paraprake, zjarri shpërtheu në një objekt të braktisur në rrugën Katsantoni. Gjatë ndërhyrjes së forcave zjarrfikëse, një pjesë e brendshme e ndërtesës u shemb papritur, duke zënë poshtë dy efektivët që ndodheshin brenda.
Pavarësisht përpjekjeve për t’i shpëtuar, dy zjarrfikësit u nxorën të pajetë nga rrënojat. Ndërkohë, një efektiv i tretë, i cili fillimisht rezultonte i zhdukur dhe po kërkohej nga autoritetet, u gjet dhe raportohet se ka marrë plagë të lehta.
Alarmi në Qendrën Operacionale të Shërbimit Zjarrfikës u dha rreth orës 11:40. Në vendngjarje u dërguan 20 zjarrfikës me gjashtë automjete, nga disa stacione zjarrfikëse të Athinës, si dhe forca të Njësisë Speciale të Menaxhimit të Fatkeqësive (EMAK). Në zonë kanë mbërritur gjithashtu dy njësi mjekësore të lëvizshme dhe dy ambulanca të EKAB-it për t’u ardhur në ndihmë personave të përfshirë në incident.
Ndërkohë, Ekipi i Hetimit të Krimeve të Zjarrvënies në Athinë është angazhuar për të përcaktuar shkaqet e zjarrit dhe rrethanat e sakta të tragjedisë.
© BalkanWeb
Χωρίς αισθήσεις ανασύρθηκαν δύο #πυροσβέστες που επιχειρούσαν στην #πυρκαγιά που εκδηλώθηκε σε εγκαταλελειμμένο κτήριο, στον δήμο Φυλής Αττικής και παρελήφθησαν από ασθενοφόρα του ΕΚΑΒ.
— Πυροσβεστικό Σώμα (@pyrosvestiki) November 14, 2026
