Sekretari i Përgjithshëm i Partisë Socialiste, Blendi Klosi, ka dhënë detaje për vendimet e marra në mbledhjen e Asamblesë Kombëtare të PS-së, e cila përfundoi pas diskutimeve me dyer të mbyllura.
Në një prononcim për mediat, Klosi tha se mbledhja ishte pjesë e kalendarit të rregullt të Asamblesë dhe se fokusi kryesor ishte përgatitja për zgjedhjet e ardhshme. Ai bëri të ditur se PS do të hapë forumet e saj për të gjithë ata që dëshirojnë të kontribuojnë, ndërsa puna do të shtrihet në mënyrë të strukturuar në çdo qendër urbane dhe rurale.
Sipas Klosit, në këto forume do të evidentohen problematikat dhe çështjet që kërkojnë zgjidhje, me qëllim që propozimet e partisë të reflektohen në garën e ardhshme elektorale dhe në drejtimin e bashkive.
Një prej zhvillimeve të bëra publike lidhet me organizimin e PS-së në Tiranë. Klosi njoftoi se drejtimi politik dhe organizativ i partisë në kryeqytet do t’u besohet dy bashkëkryetarëve, Albana Koçiu dhe Ervin Demo, ndërsa drejtimin e Bashkisë së Tiranës do ta marrë Ogerta Manastirliu.
Ai theksoi se organizimi partiak do të mbetet i pandryshuar në strukturë, pavarësisht ndryshimeve në drejtimin e bashkive.
I pyetur nga gazetarët për mundësinë e përjashtimit të Elisa Spiropalit dhe Plarent Ndrecës nga Partia Socialiste, Klosi nuk pranoi të komentonte, duke i cilësuar këto si çështje të brendshme të partisë.
Duhet të jeni pjesë e forumeve që të merrni informacion për gjërat tona të brendshme”, u shpreh ai.
