Ish-Presidenti i Republikës, Ilir Meta, ka reaguar përmes një mesazhi në rrjetet sociale menjëherë pas përhapjes së lajmit për rishikimin dhe heqjen e sanksionit “non grata” ndaj kreut të Partisë Demokratike, Sali Berisha. Meta e ka cilësuar vendimin e marrë pesë vite më parë nga Departamenti Amerikan i Shtetit si një skenar të mirëfilltë kriminal të ndërtuar kundër opozitës shqiptare.
Në qëndrimin e tij publik, kreu i Partisë së Lirisë ka nënvizuar se koha vërtetoi plotësisht paralajmërimet e tij institucionale të bëra gjatë periudhës kur ushtronte funksionin e kreut të shtetit. “Nuk i heq dot asnjë presje qëndrimit publik që kam mbajtur pesë vite më parë, si President i Republikës, për komplotin mafioz që synonte jo vetëm asgjësimin e pluralizmit politik në Shqipëri, por edhe helmimin e marrëdhënieve historike dhe strategjike mes Shqipërisë dhe Shteteve të Bashkuara të Amerikës”, shkruan Meta.
Më tej, ish-Presidenti ka lidhur drejtpërdrejt vendimmarrjen e vitit 2021 me zhvillimet e mëvonshme investigative në SHBA, duke përmendur çështjen e ish-zyrtarit të FBI-së. Sipas Metës, e ashtuquajtura “Afera McGonigal” shpjegon qartë skandalet dhe financimet e përdorura për të goditur e përçarë opozitën shqiptare, përmes korruptimit dhe keqpërdorimit të zyrtarëve të lartë në dëm të demokracisë së vendit.
Comments are closed.