Fundjava dhe ditët e fundit të muajit maj pritet të sjellin temperatura të larta dhe alternime kthjellimesh me vranësira në të gjithë territorin. Reshjet e shiut do të jenë të pakta dhe të përqendruara kryesisht në zonat malore dhe në juglindje të vendit.
Sipas parashikimit të meteorologut Hakil Osmani, orët e para të mëngjesit do të dominohen nga mot i kthjellët dhe intervale të gjata me diell. Gjatë mesditës dhe pasdites pritet shtim i lagështirës në ajër dhe shpeshtim i vranësirave, duke krijuar mundësi për reshje të izoluara shiu.
Më të prekura nga reshjet do të jenë zonat lindore dhe juglindore, ku në disa raste priten rrebeshe afatshkurtra që mund të zgjasin deri në 15 minuta. Sipas parashikimeve, reshjet nuk pritet të krijojnë probleme.
Në vijën bregdetare moti do të mbetet kryesisht i qëndrueshëm. Pjesa më e madhe e bregdetit do të ketë diell dhe vranësira kalimtare, ndërsa në jug mund të ketë reshje të lehta gjatë orëve të pasdites, si të shtunën ashtu edhe të dielën.
Temperaturat do të mbeten të larta në të gjithë vendin. Në ultësirën perëndimore maksimumet pritet të arrijnë deri në 32 gradë Celsius, ndërsa në pjesën tjetër të kësaj zone do të luhaten nga 28 deri në 31 gradë. Edhe zonat malore do të regjistrojnë temperatura të larta për periudhën, me maksimumet pranë 26 gradëve.
Rritje pritet edhe në temperaturat minimale. Në zonat malore ato do të zbresin deri në 11-12 gradë Celsius në mëngjes, ndërsa në ultësirën perëndimore dhe përgjatë bregdetit do të luhaten nga 15 deri në 20 gradë.
E njëjta situatë atmosferike pritet edhe në vendet e rajonit. Kosova, Maqedonia e Veriut dhe Mali i Zi do të përfshihen nga temperatura të larta dhe vranësira të herëpashershme. Në Kosovë temperaturat maksimale mund të arrijnë deri në 30 gradë Celsius, ndërsa në Maqedoninë e Veriut dhe Malin e Zi priten vlera nga 28 deri në 30 gradë.
Në Maqedoninë e Veriut parashikohen më shumë vranësira dhe reshje më të shpeshta gjatë pjesës së dytë të ditës gjatë fundjavës.
