Moti i keq i cili ka përfshirë vendin, ka prekur edhe qytetin e Kukësit, Hasit dhe Tropojës. Reshjet e shiut dhe erërat e forta kanë shkaktuar probleme në disa zona të Qarkut të Kukësit, duke lënë pa energji elektrike një numër të madh njësish administrative dhe lagjesh në Kukës, Has dhe Tropojë.
Reshjet me intensitet mesatar kanë përfshirë të gjithë territorin e qarkut, ndërsa moti i përkeqësuar ka sjellë edhe probleme në infrastrukturë. Në Bashkinë e Kukësit, ndërprerjet e energjisë elektrike prekin njësitë administrative Zapod, Shishtavec, Topojan, Malzi, Kolsh, Surroj dhe Tërthore, si dhe lagjet nr. 1, 2 dhe 3 të qytetit.
Situata paraqitet problematike edhe në Bashkinë Has, ku pa energji kanë mbetur qyteti i Krumës, Njësia Administrative Fajza, fshatrat Kishaj dhe Pogaj, si dhe njësitë administrative Gjinaj dhe Golaj. Ndërsa në Tropojë, ndërprerjet raportohen në Dragobi, Çerem, Dunishë, Margegaj, Tropojë dhe Fierzë.
Përveç ndërprerjeve të energjisë, moti i keq ka shkaktuar rënie gurësh dhe inertesh në disa akse rrugore. Në Tropojë është evidentuar rënie gurësh në segmentin Margegaj–Valbonë, ndërsa Kanali i Krasniqes ka regjistruar prurje të konsiderueshme uji.
Pavarësisht prurjeve të larta, deri në momentin e raportimit nuk janë konstatuar përmbytje. Megjithatë, janë evidentuar dëmtime në çatitë e disa banesave si pasojë e erës së fortë.
Autoritetet bëjnë me dije se akset rrugore nacionale vijojnë të jenë të kalueshme. Ndërkohë, subjektet kontraktore janë angazhuar në pastrimin dhe mirëmbajtjen e rrugëve në segmentet ku janë shfaqur problematika.
