Një tërmet me magnitudë 4.8 ballë ka tronditur ishullin e Kretës në jug të Greqisë, në orët e para të mëngjesit të së premtes. Autoritetet bëjnë me dije se deri më tani nuk raportohet për dëme materiale apo persona të lënduar.
Sipas Institutit Gjeodinamik të Athinës, tërmeti nënujor u regjistrua pak pas orës 02:00, me epiqendër 16 kilometra në jug të zonës së Kali Limenes, në pjesën jugore të Kretës. Lëkundjet u shkaktuan në një thellësi prej rreth 32 kilometrash.
Greqia është një nga vendet me aktivitetin më të lartë sizmik në botë, ku çdo ditë regjistrohen dhjetëra tërmete, shumica e të cilëve nuk ndihen nga banorët. Ishulli i Kretës është veçanërisht i ekspozuar ndaj lëkundjeve sizmike, pasi ndodhet pranë zonës ku takohen pllaka tektonike evropiane dhe afrikane.
