Elisa Spiropali dhe Plarent Ndreca, zyrtarisht, nuk janë më pjesë e Partisë Socialiste të Shqipërisë!
Këtë e ka konfirmuar vetë sot Edi Rama, duke sqaruar përfundimisht aludimet dhe keqkuptimet e një vendimi të marrë në Asamblenë Kombëtare të Partisë Socialiste, një javë më parë, në Gjirin e Lalëzit.
Para socialistëve të Tiranës, sot kryeministri dhe kryetari i PS, Edi Rama tha Spiropali dhe Ndreca janë dy të përjashtuarit e ditëve të fundit dhe për ta nuk ka më vend në familjen e madhe socialiste sepse kanë guxuar të flasin e të sillen ndryshe nga linja e partisë.
“Ky i fundit (Plarent Ndreca) i adresohet shkresërisht Bashkisë së Tiranës, duke firmosur si drejtues politik, ndërkohë që është thjesht një nga dy të përjashtuarit e ditëve të fundit nga kjo shtëpi.
Ku nuk do të tolerohet më askush që flet dhe sillet me detyrat ndaj popullit dhe kësaj familje, si e ëma e Zeqos në majë të thanës”, u shpreh Edi Rama, teksa fliste për largimet me urdhër të Veliaj nga Bashkia e Tiranës.
Ai paralajmëroi besnikët e Veliajt në bashki, se nëse vazhdojnë me zbatimin e vendimeve të tilla, do të gjykohen me ashpërsinë më të madhe politike, nga PS.
“Çdo drejtuesi dhe çdo hallke të Bashkisë së Tiranës, ju them sot se goditja e njerëzve në krye të detyrës, me porosi nga lart, me motive krejt të pajustifikueshme, as nuk do të harrohet dhe as nuk do të falet”, tha kryeministri.