Të paktën dy persona kanë humbur jetën pas shembjes së një ndërtese në Brooklyn, në New York të SHBA-së. Lajmi është bërë i ditur nga kryebashkiaku i qytetit, Zohran Mamdani, i cili e cilësoi ngjarjen si një situatë shkatërruese.
Sipas tij, ekipet zjarrfikëse mbërritën në vendngjarje vetëm një minutë pas telefonatës së parë në numrin e emergjencës 911.
Pamjet e transmetuara nga helikopterët e mediave tregojnë qindra efektivë të angazhuar në kërkimet nën rrënoja, në përpjekje për të gjetur persona të mbijetuar. Ekipet e shpëtimit janë detyruar të përdorin edhe mjete prerëse për të hapur rrugë mes mbetjeve të ndërtesës.
Kryebashkiaku Mamdani e përshkroi situatën si jashtëzakonisht të vështirë dhe dinamike, duke theksuar rrezikun që paraqesin strukturat e paqëndrueshme dhe hapësirat e rrezikshme nën rrënoja.
Ndërkohë, katër nga personat e plagosur ndodhen në gjendje kritike për jetën. Në operacionin e kërkim-shpëtimit janë angazhuar më shumë se 250 zjarrfikës.
Deri më tani, mbetet e paqartë se sa persona mund të jenë ende të bllokuar nën rrënojat e ndërtesës trekatëshe, ndërsa operacionet vijojnë.
