Kryeministri Edi Rama ka reaguar sërish në rrjetet sociale, kësaj here lidhur me videon e publikuar një ditë më parë ku ai shfaqej në shoqërinë e disa personave në Basel të Zvicrës.
Përmes një postimi në platformën “X”, kreu i qeverisë iu është përgjigjur kritikëve dhe akuzave që sipas tij janë ngritur pa asnjë bazë, duke sqaruar njëherë e mirë rrethanat e udhëtimit dhe duke hedhur poshtë çdo pretendim për përdorimin e “lekëve të shqiptarëve”.
Rama shprehet se udhëtimi në Zvicër nuk kishte asnjë lidhje me detyrën e tij shtetërore, por ishte një ftesë private nga ArtBasel, panairi më i njohur ndërkombëtar i galerive të artit, ku janë ekspozuar dhe veprat e tij.
Ai bën me dije se gjatë qëndrimit 1 ditë e gjysmë në Basel është shoqëruar nga bashkëshortja e tij, Linda Rama, dhe se të gjitha shpenzimet janë mbuluar nga vetë ata, ashtu siç ka ndodhur në çdo rast të ngjashëm gjatë viteve.
“Në Zvicër isha i ftuar privatisht nga ArtBasel, panairi i përvitshëm i galerive më prestigjoze të artit në botë, ku janë prezantuar edhe vepra të miat. Kemi udhëtuar dhe qëndruar një ditë e gjysëm me bashkëshorten, si gjithnjë në këto raste plotësisht me shpenzimet tona”, shkruan Rama ndër të tjera, duke u ndalur në vijim dhe te akuzat që e kanë shoqëruar përgjatë gjithë karrierës së tij politike.
Ai thekson se në gati tre dekada shërbim publik nuk ka udhëtuar asnjëherë privatisht me para të shtetit, duke shtuar se edhe familja e tij nuk ka përfituar nga fondet publike për udhëtime personale.
Reagimi i plotë i Edi Ramës:
Qenka shpërndarë një video ku dikush më paska kapur mat duke pirë ujë në Basel të Zvicrës me shpenzimet e shtetit..
Në thuajse tre dekada shërbim publik unë kurrë nuk kam udhëtuar privatisht me lekët e shtetit dhe e njëjta gjë vlen edhe për familjen time.
Në 13 vjet në detyrën e kryeministrit unë dhe familja ime kurrë nuk kemi shkuar me pushime jashtë shtetit.
Në Zvicër isha i ftuar privatisht nga ArtBasel, panairi i përvitshëm i galerive më prestigjoze të artit në botë, ku janë prezantuar edhe vepra të miat. Kemi udhëtuar dhe qëndruar një ditë e gjysëm me bashkëshorten, si gjithnjë në këto raste plotësisht me shpenzimet tona.
Por ky është një rast i mirë në kohën e duhur, për të vënë një pikë të qartë mbi “i”:
Rreth njëzetë vite më parë, kur nuk më ishte regjur ende lëkura me baltën e shpifjeve e të akuzave pa hesap, pata vënë kujën publikisht duke thënë që “s’ka bir nëne a bir k…, që të gjejë në xhepin tim një qindarkë që s’është fituar me punë të ndershme”!
Sot, dy dekada më vonë, nuk jam më natyrisht ai 40 vjeçari i pamësuar ende me qenërinë e arenës plot baltë të jetës politike, i cili humbte gjumin nga plagët përvëluese të shpifjeve dhe akuzave kriminale.
Por e them me krenari, se ajo fjali e lëshuar asokohe nga dhimbja e nga ndjenja e turpit përpara njerëzve të mi dhe të gjithë atyre që më kishin besuar drejtimin e Tiranës, qëndron 100% e paprekshme në përmbajtjen e saj edhe sot, përballë të gjithë atyre që më kanë besuar drejtimin e Shqipërisë.
Dhe mos e harroni asnjëherë:
Kush shpif apo akuzon pa prova kundër jush, ose e ka bërë vetë atë për të cilën ju akuzon ose do ta bënte po të ishte në vendin tuaj, prandaj edhe gjelozia apo urrejtja ose të dyja bashkë e bëjnë t’i besojë çdo maskarallëku që nxjerr nga goja.
Kur shoh se si bota ku jetojmë është bërë gjithnjë e më shumë falë rrjeteve sociale, lëndina ku ferrat e pafundme të rrenës shumohen me shpejtësinë e klikimit, ndërsa lulet e së vërtetës mbyten rëndom nga ferrat, më shkon gjithnjë mendja tek Librat e Shenjtë, ku shpifësi shfaqet edhe më i keq se vrasësi.
Comments are closed.