Tetë persona kanë humbur jetën në dy aksidente të ndodhura brenda më pak se një ore në autostradën M1, pranë qytetit Győr në Hungari, një nga korridoret më të rëndësishme të transportit që lidh Budapestin me Austrinë.
Sipas policisë hungareze, aksidenti i parë ndodhi rreth orës 04:30 të mëngjesit, pranë kilometrin 114 të autostradës, ku një kamion u përplas me një automjet të shërbimit të mirëmbajtjes rrugore. Pas përplasjes, kamioni shpërtheu në flakë, ndërsa drejtuesi i tij humbi jetën në vendngjarje.
Autoritetet ndërhynë menjëherë dhe mbyllën segmentin e prekur të autostradës për shkak të hetimeve dhe rrezikut në qarkullim.
Vetëm rreth 40 minuta më vonë, në një distancë shumë të afërt me vendin e parë të aksidentit, ndodhi një tjetër përplasje fatale. Një minibus me nëntë pasagjerë u përplas me një kamion të ndalur si pasojë e trafikut të krijuar nga aksidenti i mëparshëm.
Si pasojë e përplasjes, shtatë persona që ndodheshin në minibus humbën jetën në vend, ndërsa dy të tjerë u plagosën dhe u dërguan për trajtim në spital.
Autoritetet konfirmuan se të tetë viktimat e dy aksidenteve ishin shtetas të huaj, ndërsa po vijojnë hetimet për të përcaktuar plotësisht shkaqet e ngjarjeve tragjike.
Comments are closed.