Vëllai i ish-kryeministrit të Hungarisë Viktor Orban, Aron Orban është arrestuar nga policia. Lajmin e ka bërë të ditur kryeministri, Peter Magyar.
Sipas autoriteteve, operacioni është zhvilluar në disa ambiente në kryeqytet dhe në qarkun Pest, në kuadër të dy procedimeve penale që po hetohen paralelisht.
Hetimet lidhen edhe me një skemë të dyshuar për sigurimin e lejeve të qëndrimit për punësim, ku persona të përfshirë dyshohet se u kishin premtuar biznesmenëve lehtësimin e procedurave përmes lidhjeve të tyre me zyrtarë me ndikim.
Sipas Prokurorisë Qendrore të Hetimeve, dy të dyshuar kishin marrë paraprakisht 17 mijë euro nga një biznesmen, shumë të cilën dyshohet se e kishin ndarë mes tyre. Katër persona janë marrë në pyetje si të dyshuar për ushtrim të ndikimit të paligjshëm dhe vepra të tjera penale, ndërsa dy prej tyre janë lënë në arrest me vendim gjykate.
Reagon Viktor Orban: Jam unë objektivi, vëllai im është vetëm mjet
Në reagimin e tij publik, lideri i opozitës dhe kreu i Fidesz, Viktor Orbán, pretendon se operacioni ka si objektiv të vërtetë atë personalisht, ndërsa vëllai i tij po përdoret për të arritur këtë qëllim.
“Unë jam objektivi, vëllai im është vetëm një mjet për të arritur qëllimin”, deklaroi Orbán në një postim në Facebook.
Ai e cilësoi operacionin si një përpjekje për hakmarrje politike dhe për eliminimin e kundërshtarëve, duke pretenduar se autoritetet po përdoren për të goditur opozitën.
