Prokuroria e Tiranës ka kërkuar dënimin me 35 vite burg për Vladimir Kolën, i cili akuzohet për vrasjen me paramendim të Briken Sanajt, ngjarje e ndodhur më 30 tetor 2022 në zonën e “Kodrës së Diellit” në Tiranë.
Në përfundim të hetimeve, organi i akuzës ka vlerësuar se vrasja është kryer për motive hakmarrjeje, pas një konflikti të mëparshëm që i dyshuari për autor kishte pasur me vëllain e viktimës.
Prokuroria ka kërkuar gjithashtu 3 vite burg për shtetasin Gj.K. dhe 2 vite burg për K.A., të akuzuar për veprën penale të moskallëzimit të krimit. Sipas hetimeve, ata kishin dijeni për personin të cilit i kishin shitur automjetin e përdorur në vrasje, por nuk kishin bërë të ditur identitetin e tij.
Ndërkohë, për shtetasin E.H. është kërkuar dënimi me 5 vite burg, pasi dyshohet se ka ndihmuar Vladimir Kolën gjatë qëndrimit në Mal të Zi, duke e pritur, organizuar akomodimin e tij në një hotel dhe më pas duke e përcjellë sërish jashtë vendit.
Kujtojmë se ngjarja ka ndodhur më 30 tetor 2022, ku Sana u vra me tre plumba kallashnikovi pranë banesës së tij, në lagjen “Kodra e Diellit”. Autori i e kishte pritur viktimën teksa ky i fundit po kthehej nga një gëzim familjar në qytetin e Lezhës.
Konflikti mes dy familjeve lidhet me një ngjarje të ndodhur rreth 10 vite më parë, kur Antonio, i njohur edhe si Renato Sanaj, vëllai i viktimës, plagosi Gentian Kolën, i cili mbeti invalid. Pas kësaj ngjarjeje, dy familjet në Lezhë u futën në hasmëri dhe tentativat për pajtim ishin të pasuksesshme.
Njoftimi i plotë:
Vrasja për hakmarrje tek ‘Kodra e Diellit’, Prokuroria e Tiranës kërkon 35 vite burg për autorin shtetasin V.K.
Prokuroria pranë Gjykatës së Shkallës së Parë të Juridiksionit të Përgjithshëm, Tiranë kërkon 35 vite burg për shtetasin V.K., për kryerjen e veprës penale ‘Vrasje me paramendim’ dhe ‘Mbajtje pa leje dhe prodhimi i armëve shpërthyese dhe municionit’ parashikuar nga nenet neni 78/2 dhe 278/1 të Kodit Penal me viktimë shtetasin B.S.
Si dhe dënimin me nga 3 dhe 2 vite burg për shtetasit Gj.K. dhe K.A. për veprën penale ‘Moskallëzim krimi’ parashikuara nga neni 300 i Kodit Penal, si dhe dënimin me 5 dhe 2 vite burgim për shtetasit E.H., dhe Z.K., të akuzuar për veprat penale ‘Përkhrahja e autorit të krimit’ dhe ‘Veprime që pengojnë drejtësinë’ parashikuar nga nenet 302 dhe 301 të Kodit Penal.
Në përfundim të hetimeve mbi procedimin penal nr. 7911 të vitit 2022, Prokuroria pranë Gjykatës së Shkallës së Parë e Juridiksionit të Përgjithshëm Tiranë vlerësoi se shtetasi V.K. ka kryer me paramendim për hakmarrje vrasjen e shtetasit B.S., pasi ka pasur një konflikt me vëllain e tij, shtetasin R.S. vite më parë. Ai kreu një sërë veprimesh për të mos lënë gjurmë me ardhjen dhe largimin nga Shqipëria, duke hyrë e dalë nga Mali i Zi dhe duke blerë mjet tip veturë pa kryer veprime noteriale. Ky shtetas vite më parë ka pasur konflikt me vëllain e viktimës dhe ai dhe familjarët kanë pasur pretendime për plagosjen e familjarit të tyre.
Po kështu, në lidhje me këtë hetim, Prokuroria pranë Gjykatës së Shkallës së Parë të Juridiksionit të Përgjithshëm, Tiranë, kërkoi dëmin e tre dhe dy vite burg për shtetasit Gj.K. dhe K.A. të cilët edhe pse kishin dijeni nuk kallëzuan emrin e personit për të cilin kishin shitur makinën me të cilën u krye vrasja e viktimës, pa kontratë.
Ndërsa kërkesa për dënimin me pesë vite burg u bë për shtetasin E.H., i cili rezultoi se ka pritur në Malin e Zi shtetasin V.K., si dhe ka bërë përcjelljen e tij po nga ky shtet dhe ka siguruar dhomën e hotelit dhe qëndrimin duke përkrahur autorin e krimit. Së fundmi, për shtetasin Z.K., u kërkuan dy vite burgim pasi ka kryer fshirjen e kamerave të sigurisë kur i pandehuri V.K., kanë drekuar dhe kanë kryer blerjen e mjetit.