Në kuadër të 35-vjetorit të Partisë Socialiste, kryeministri Edi Rama gjatë një takimi në Dibër ka dhënë dje sinjale se do të “lëshojë” ish-zv/kryeministren Belinda Balluku dhe zyrtarë të tjerë të lartë socialistë që po hetohen nga drejtësia, kryesisht Prokuroria e Posaçme (SPAK) si të përfshirë në afera korruptive. Duke folur për pavarësinë e institucioneve, Rama deklaroi se qeveria po pranon “goditjet” nga pushteti i drejtësisë, pa reaguar për ta penguar atë siç ka ndodhur në dekada të shkuara.
Ai theksoi se demokracia nuk mund të funksionojë pa ndarjen e tre pushteteve dhe se, sipas tij, Shqipëria po ecën në drejtimin e duhur pavarësisht vështirësive. Madje duke folur për sistemin e drejtësisë, Rama tha se pranimi i goditjeve nga një pushtet tjetër, si ai i drejtësisë është një tregues i rrugës së duhur të vendit. “Demokracia nuk funksionon nëse nuk ka tre pushtetet të ndara dhe ne po bëjmë demokracinë të funksionojë pavarësisht të gjitha vështirësive dhe pavarësisht të gjitha kostove.
Prandaj edhe kush na hidhet në fyt duke na treguar se sa veta u burgosën dhe sa u hetuan, e sa veta janë të përfshirë këtu e atje, dhe pastaj habitet kur del rezultati nga kutitë e votimit. Është kaq imbecil sa nuk kupton që populli shqiptar në shumicë, duke qenë një popull europian në shpirt dhe në Europë në mendje, e kupton që të gjitha këto janë kostot e një ndërmarrjeje historike që mund ta bënte dhe mund ta bëjë vetëm Partia Socialiste e Shqipërisë.
E kuptojnë që këto janë prova, prova që drejtësia që ne po mbështesim, që të ndërtohet, nuk është lojë, është reale. Kur një pushtet pranon të goditet nga një pushtet tjetër, si pushteti i drejtësisë, dhe nuk reagon për ta shkelur me këmbë siç mund ta kishte shkelur dhe siç e ka shkelur për dhjetëra vite, atëherë rruga e vendit është rrugë e sigurt. Rruga e lirisë është rrugë e sigurt, rruga e të drejtave dhe e barazisë para ligjit është rrugë e sigurt. Kjo është Partia Socialiste e Shqipërisë”, deklaroi dje Rama.
Prapaskenat
Por ky qëndrim i kryeministrit Edi Rama vjen në një moment kritik, kur Bashkimi Evropian ka vendosur palët në pozita të vështira, duke kërkuar jo vetëm dorëheqjen apo përballjen me ligjin të figurave të larta, por edhe dhënien fund të pandëshkueshmërisë. Brukseli e ka bërë të qartë se rezultatet konkrete kundër korrupsionit të nivelit të lartë janë kushti i vetëm për të zhbllokuar negociatat e anëtarësimit. Brenda radhëve të mazhorancës, fjalët e Ramës për “kosto të një ndërmarrjeje historike” shihen si një distancim i parathënë nga ata që po hetohen nga SPAK.
Duke etiketuar kritikët si “imbeçilë”, kryeministri tentoi të mbrojë linjën e tij, duke theksuar se populli e kupton që këto janë prova reale se drejtësia nuk është më lojë. Megjithatë, kjo deklratë është një pranim se politika nuk mund të jetë më mburojë për askënd. Tashmë, fati i figurave si Belinda Balluku duket se nuk varet më nga vullneti i qeverisë, por nga provat e SPAK-ut. Rama shfrytëzoi këtë platformë për të legjitimuar sakrificën e bashkëpunëtorëve të tij në emër të integrimit evropian.
Në këtë formë, ai po përgatit terrenin për çdo zhvillim të mundshëm gjyqësor që mund të godasë kupolën e qeverisë. Me këtë lëvizje, kryeministri kërkon të shmangë izolimin ndërkombëtar, duke dorëzuar praktikisht çdo zyrtar që gjendet në shënjestrën e ndërkombëtarëve, ku e parë që rrezikon prangat është ish-zv/kryeministrja Belinda Balluku, për të cilën SPAK pritet të ngrejë akuza të reja si pastrim parash dhe korrupsion. Pra kjo situatë tregon se rruga e Shqipërisë drejt BE-së duket se tani kalon detyrimisht përmes shkarkimit të “kokave” të korruptuara brenda kabinetit të qeverisë “Rama”.
Comments are closed.